Ai ka investuar shuma të mëdha parash, në përpjekje për të gjetur një vaksinë kundër koronavirusit, por ai është gjithashtu një objektiv i preferuar nga teoricienët e konspiracionit.
Themeluesi i “Microsoft”, Bill Gejts, 64 vjeç, zotëron një pasuri me vlerë 116 miliardë dollarë, duke qenë njeriu i dytë më i pasur në botë pas themeluesit të “Amazon”, Xhef Bezos.
Në një intervistë për “Der Spiegel”, miliarderi amerikan flet për progresin drejt zhvillimit të një vaksine, dhe ku kanë gabuar Shtetet e Bashkuara në menaxhimin e koronavirusit.
Nga ana tjetër, Gejt apelon ndaj gjithë njerëzve kudo në botë të vaksinohen, duke i cilësuar qesharake pretendimet se po tenton t’u vendosë atyre një mikroçip në trup për t’i mbajtur nën kontroll.
Deri tani koronavirusi u ka marrë jetën thuajse 1 milion njerëzve. A ju ka befasuar kjo pandemi?
Disa aspekte të saj janë shumë të habitshme. Sigurisht, ideja se bota ishte e rrezikuar nga një epidemi e aparatit të frymëmarrjes dhe e transmetueshme nga një njeri tek tjetri, është diçka për të cilën kanë folur prej kohësh shumë ekspertë të shëndetit.
Por ata bisedonin kryesisht me njëri-tjetrin. Askush nuk e priste që mund të ishte pandemia e koronavirusit. Në retrospektivë, ju mund të thoni: Hej, po ne kemi MERS-in, SARS-in, dhe kjo familje e koronaviruseve mund t’i kapërcejë kufijtë midis specieve. Por na u desh kohë të kuptojmë simptomat e kësaj sëmundje.
Çfarë mund të bënim për të mos u gjendur kaq të papërgatitur?
Në vitin 2015, në fund të epidemisë së Ebolas në Afrikën Perëndimore, unë thashë që ne nuk jemi realisht gati për një pandemi tjetër. Ajo çka u bë midis vitit 2015 dhe pandemisë aktuale që u shfaq në fundin e vitit 2019 ishte shumë, shumë modeste.
Cilat nga gabime në luftën kundër pandemisë ju shqetësojnë më shumë?
Që nuk e kuptuam që në fillim që mbajtja e maskave, ishte kaq shumë e rëndësishme. Si fillim ekspertët thanë: Mos përdorni maska ??sepse na duhen për punonjësit e shëndetësisë. Më pas ata thanë:Nëse je i sëmurë, maska ??është e dobishme. Dhe u desh pak kohë që të kuptohej se edhe për njerëzit që nuk janë të infektuar, mbajtja e maskës ka përfitime, pasi e zvogëlon mundësinë e infektimit të tyre.
Sa përgjegjësi ka presidenti amerikan Donald Trump në dështimin e Shteteve të Bashkuara për t’iu përgjigjur në mënyrë e duhur kësaj krize?
Reagimi i SHBA-së ndaj pandemisë ka qenë shumë i dobët, sidomos me testimet. Dhe lidershipi politik është plotësisht përgjegjës për këtë dështim.
Trump po e tërheq SHBA nga Organizata Botërore e Shëndetësisë. Nisma si fondacioni juaj mund ta plotësojnë një boshllëk të tillë…
Jo, asnjëherë. Fondacioni ynë nuk mund të mbushë boshllëqet që krijon qeveria amerikane. Ky nuk është roli ynë. Gjëja e fundit që mund të bëjë një biznes, është t’i ndihmojë qeveritë kur ato sillen në mënyrë të papërgjegjshme.
Rezultatet e zgjedhjeve në SHBA mund të varen nga vaksina e koronavirusit, që mund të aprovohet nga Administrata e Ushqimit dhe Barnave (FDA) para 3 nëntorit. Por ndërkohë ka shqetësime serioze në lidhje me efikasitetin dhe sigurinë e vaksinës nëse aprovimi ndodh para se të përfundojë testimi. A ia vlen të rrezikohet?
Askush nuk do të prodhojë një vaksinë që nuk ka përfunduar provat e Fazës III. Ideja që sugjeroi administrata Trump, përfshirë kreun e FDA-së, ishte e papërgjegjshme. Kompanitë farmaceutike e kanë bërë të qartë se nuk do të kërkojnë autorizimin e përdorimit emergjent të vaksinës pa të dhënat e plota të Fazës III.
Kur mendoni se do të jetë në dispozicion vaksina?
Ekziston një shans i vogël që “Pfizer” dhe “Moderna” të kenë të dhëna të mjaftueshme deri në fund të tetorit. Nga 6 vaksinat që po testohen – “AstraZeneca”, “Johnson & Johnson”, “Novavax” dhe “Sanofi”, plus dy vaksinat e ARN-së, “Pfizer” dhe “Moderna” – pres që 3 ose 4 prej tyre të marrin lejen e përdorimit emergjent deri në fillim të vitit 2021. Në fillim të vitit të ardhshëm besoj se ka 90 për qind gjasa që të kemi disa vaksina. Unë dyshoj se kjo çështje do të ketë ndonjë efekt në zgjedhje. Dhe nuk duhet si rregull, pasi politikanët nuk prodhojnë vaksina.
A do të vaksinoheni ju vetë?
Unë do të privilegjoj qasjen time ndaj vaksinës nëse ajo do të jetë në sasi të pakta në fillim. Nëse sipas kritereve normale kualifikohem, do të vaksinohem. Por mendoj se në fillim duhet të vaksinohen ata që janë më të rrezikuar:mjekët, infermierët, njerëzit që punojnë në azilet e pleqve apo burgjet etj.
Një në tre amerikanë refuzon të vaksinohet kundër Covid-19…
Shpresoj të kemi mundësi që të krijojmë një imunitet shumë të fortë të tufës me vaksinimin e 60-70 për qind të popullsisë. Shpresoj që qeveritë të jenë në gjendje të bindin mjaftueshëm qytetarë që të vaksinohen pa përdorur masa shtrënguese, pasi kjo do të çonte pikërisht në këtë reagim të madh kundër vaksinës.
Ju personalisht jeni në shënjestër e teorive të ndryshme të komplotit. Për shembull, thuhet se keni ndërmend ta përdorni vaksinën për të implantuar mikroçipa tek njerëzit. Cili është komenti juaj?
Kjo nuk është e vërtetë. Nuk e krijova unë koronavirusin. Fondacioni ynë është i angazhuar në shpëtimin e jetës së njerëzve.
