Deputeti Lefter Maliqi kërkon largimin e Sandër Lleshajt nga posti i drejtuesit të Ministrisë së Brendshme. Maliqi bën me dije se ka kërkuar interpelancë urgjente me Sandër Lleshajn lidhur me situatën e kriminalitetit në vend.
Në një postim në FB, ai shkruan:
Në pritje të interpelancës urgjente me Ministrin e Brendshëm Sandër Lleshaj… Isha duke pritur largimin e Ministrit të Brendshëm, meqënëse e deklaroi vetë nga Vlora, por kur e ktheu prapë në Elbasan, se do të jetë në qeveri edhe për ca muaj të tjerë, (merret me mend ky ndryshim vendimi), depozitova sot në Kuvend kërkesën urgjente për interpelancë me Sandër Lleshajn.
Ministri që e ka mendjen të bredhë më BMË-në 150 mijë euroshe, duhet të japë llogari për situatën e kriminalitetit në vend, me vrasje, atentate e aksidente çdo ditë, ngjarjet e rënda të pazbardhura, si po kryhet vetingu në polici, kultivimi i kanabisit nëpër qarqe etj.
Megjithëse Ministri ynë me ‘një këmbë në varr’, e ka pranuar vetë dështimin këto ditë, kjo punë nuk kalon kaq thjesht.
Në media, Ministri ka për detyrë ti përgjigjet pyetjeve, por në Kuvend, ka për detyrë të japë llogari.
Jam në pritje të ballafaqimit në tempullin e Demokracisë me njeriun që i ka mbetur sahati në kohën e ‘xhaxhit’.
Edhe pse më 25 Prill, kjo qeveri do shporret me firmën e shqiptarëve, kjo nuk do të thotë që këta muaj të mbetur, shqiptarët të hanë plumbat qorrë duke bërë xhiro në bulevard.
Kryeministri i marrë fund, siç largoi Turi Shahinin, të shporrë edhe një Ministër Rendi të paaftë, para se të shporret edhe vetë.
Qytetarë të devotshëm e të zotë, ka plot ky vend!
