Komuniteti i shqiptarëve në Greqi: Rama nuk takoi emigrantët, por degën e PS në Athinë |

Komuniteti shqiptar në Greqi ka reaguar pas vizitës së Kryeministrit Edi Rama në Athinë. Përfaqësia e komunitetit, një organizatë ku aderojnë një përqindje mjaft e lartë shoqatash nga e gjithë Greqia, por edhe një numër i madh aktivistësh të paanëtarësuar në shoqata, deklaratën se ditën e sotme Edi Rama nuk është takuar me emigrantët, por me degën e PS në Athinë.

Në një deklaratë për mediat, Komuniteti Shqiptar në Athinë deklaron se “u informuan disa herë se nuk do të ketë një takim me komunitetin, përveç një aktiviteti të ngushtë me strukturat e Partisë Socialiste në Athinë e Greqi”.

Komunitetin Shqiptar në Greqi deklaron se informacioni i marrë nga Ambasada në Athinë konfirmon se nuk ka pasur në axhendë asnjë takim me emigrantët shiptarë dhe kryeministrit Edi Rama.

“Komuniteti shqiptar në Greqi NUK kishte kurrë një takim me kryeministrin! AS ishte takim me emigrantët që jetojnë e punojnë në Greqi takimi i sotëm i mesditës së 16 shtatorit. Dhe në komunikim me Ambasadën na u bë e qartë se në axhendën e Kryeministrit nuk kishte një takim të tillë.

Takimi në fakt u zhvillua me koordinatorët e fushatës elektorale të Partisë Socialiste Athinë e Greqi, dhe me stafin e kompanisë Top Lines e cila tradicionalisht kryen dhe transportin falas të votuesve të majtë drejt Shqipërisë, sa herë që ka votime. Mesa duket takimi ishte për startimin e fushatës elektorale”,- thuhet në deklaratën e Komunitetin Shqiptar në Greqi.

Lexo edhe:

Mbytet barka me emigrantë, të paktën 8 të vdekur, 2 prej tyre fëmijë

Vrasja e 14-vjeçarit, Rama sulmon protestuesit: Po motivohen nga politika

Deklarata e plotë e Komunitetin Shqiptar në Greqi

Të nderuar bashkatdhetarë, aktivistë, anëtarë të shoqatave që aderojnë në “Komunitetin Shqiptar në Greqi” (ish-FSHSHG).

Bordi drejtues ndoqi me shumë vëmendje vizitën e kryeministrit shqiptar në Greqi, të parën në thuajse 8 vjet qeverisje! Në kuadrin e forumit të “Economist” u hodhën hapa të rëndësishëm, si për integrimin e atdheut tonë në familjen europiane, ashtu dhe për mbajtjen e ekuilibrit në marrëdhëniet bilaterale mes dy vendeve fqinje, që për ne janë dy vendet tona.

Ndërkaq, ne u interesuam vazhdimisht për një takim, akoma dhe të shkurtër, me përfaqësues të komunitetit emigrant.

Duke qenë tepër të vetëdijshëm se koha ishte e kufizuar, por edhe përgjegjës për situatën e rrezikshme nga covid-19, do të mjaftoheshim me shumë pak përfaqëues e do të siguroheshim se do të respektoheshin të gjitha masat mbrojtëse.

Të jeni të bindur se ne do informonim të gjithë anëtarët, shoqatat aderuese si dhe aktivistët për një takim të tillë, sapo të konfirmohej, për të vendosur së bashku përfaqësimin.

POR, por, komuniteti shqiptar në Greqi NUK kishte kurrë një takim me kryeministrin! AS ishte takim me emigrantët që jetojnë e punojnë në Greqi takimi i sotëm i mesditës së 16 shtatorit. Dhe në komunikim me Ambasadën na u bë e qartë se në axhendën e Kryeministrit nuk kishte një takim të tillë.

Këtë, madje, e konfirmuan hapur nga kjo strukturë shumë anëtarë e aktivistë që u interesuan për këtë aktivitet.

Jo, kryeministri Edi Rama nuk u dha aspak shansin bashkatdhetarëve emigrantë të flisnin! Ose, akoma më keq, kryeministri kujtonte se takonte përfaqësi, por përfaqësuesit e tij në Greqi “e mashtruan”, pak e vështirë për të qenë e vërtetë.

Së fundi, për të luftuar disinformimin që bëhet në kurrizin tonë ju ftojmë ta shpërndani këtë informacion në lidhje me këtë injorim të hapur dhe shfrytëzim të përsëritur të emrit e kontributit tonë, nga pala e shtetit shqiptar.

Përzemërsisht,

Kryesia e “Komunitetit Shqiptar në Greqi”, ish-FSHSHG