Nga BoldNews.al
Ardian Dvorani, ish-anëtari i Gjykatës së Lartë dhe tashmë gjyqtar në Apelin Administrativ, mbetet jashtë Këshillit të Emërimeve në Drejtësi (KED).
Ai është penalizuar nga kërkesa e tij që KED të shprehej me vendim për rikthimin e tij në këtë institucion, si edhe nga precedenti që vendosi vetë më herët, kur një rast i ngjashëm u diskutua për ish-Prokuroren e Përgjithshme, Arta Marku.
Këshilli i Emërimeve në Drejtësi, në mbledhjen e kësaj të Mërkure, konstatoi se kërkesa e Dvoranit për t’u shprehur me vendim të posaçëm nëse ai duhej të merrte pjesë apo jo në mbledhje “nuk hyn në veprimtarinë dhe kompetencën e këtij institucioni”.
Ardian Dvorani u largua nga Gjykata e Lartë dhe njëkohësisht nga drejtimi i Këshillit të Emërimeve në Drejtësi në Qershor të këtij viti, pasi Këshilli i Lartë Gjyqësor (KLGJ) konstatoi përfundimin e mandatit të tij si gjyqtar.
Rreth dy muaj më vonë, në fund të Korrikut 2020, KLGJ e emëroi atë në pozicionin e gjyqtarit në Gjykatën Administrative të Apelit.
Largimi dhe më tej rikthimi i Dvoranit në sistemin gjyqësor krijoi një paqartësi lidhur me pozicionin e tij si anëtar i Këshillit të Emërimeve në Drejtësi, funksion që e fitoi në bazë të një shorti të zhvilluar nga institucioni i Presidentit të Republikës, në Dhjetor 2019.
Në këtë situatë konfuze, kryetarja në detyrë e KED, Vitore Tusha, i dërgoi Dvoranit njoftim për t’u paraqitur në mbledhjen e radhës, e cila ishte parashikuar të zhvillohej në 21 Gusht 2020.
Në përgjigje të këtij njoftimi, Dvorani i dërgoi Këshillit të Emërimeve në Drejtësi një letër të gjatë, të cilën e mbyllte me kërkesën që rikthimin e tij do të ndodhte vetëm pas një vendimmarrje të posaçme nga ana e atij institucioni.
“…E konsideroj të papërshtatshme qenien të pranishëm në këtë mbledhje të Këshillit, deri në diskutimin dhe vendimmarrjen e domosdoshme të Këshillit për çështjen e vijueshmërisë ose jo të ushtrimit të detyrës sime si anëtar i KED në mbledhjet dhe veprimtaritë e ardhshme të tij”, shkruante Dvorani në shkresën e tij të mesit të gushtit.
Pikërisht, kjo kërkesë e tij, për një vendim të posaçëm, nuk u mor në konsideratë nga ana e Këshillit të Emërimeve në Drejtësi.
KED arriti në konkluzionin se nuk është struktura kompetente për t’u shprehur për këtë aspekt procedurial, pasi anëtarët e tij as nuk emërohen dhe as nuk shkarkohen nga Këshilli i Emërimeve në Drejtësi.
Në fakt, një qëndrim të ngjashëm ka mbajtur edhe vetë Dvorani, kur drejtonte Këshillin e Emërimeve në Drejtësi, në Janar 2019.
Arta Marku, e cila mbante detyrën e Prokurores së Përgjithshme të Përkohshme, u shortua si anëtare e Këshillit të Emërimeve në Drejtësi.
Në të njëjtën ditë, rreth 2 orë më vonë, Parlamenti votoi emrin e Olsian Çelës si Prokuror të Përgjithshëm me mandat të plotë, duke zëvendësuar në zyrë Arta Markun.
Në mbledhjen e parë të Këshillit të Emërimeve në Drejtësi, në janar 2020, Ardian Dvorani dhe pjesa tjetër e KED-së miratuan në heshtje praninë e Arta Markut.
Dvorani, në atë kohë në cilësinë e kreut të Këshillit të Emërimeve në Drejtësi, deklaroi se KED nuk ka kompetencë që të emërojë apo shkarkojë/largojë anëtarë nga detyra, pasi nuk është kompetencë e tij.
