Kryeministri Edi Rama gjatë mbledhjes së fundit që ka pasur me drejtuesit politikë në qarqe ka kërkuar që në 25 prill të sigurohen 74 mandate deputetësh.
Mbrëmjen e djeshme, Erion Veliaj, drejtues politik për Bashkinë e Tiranës, tha se strategjia e PS do të bazohet “mbrojtje e rezultatit në Jug dhe sulm në veri të vendit”.
Por Lindita Nikolla, drejtuese politike për qarkun e Lezhës, shprehet se PS synon që në këtë qark të marrë 3 mandate. Shifra është e njëjtë me mandatet që mori në 2017.
Në zgjedhjet e 3 viteve më parë mandatet për Lezhën u ndanë në 3 për PS, 3 për PD dhe 1 për LSI, ndërsa si forcë politike socialistët kishin më shumë vota se demokratët.
“Kemi ambicie për të marrë më shumë. Po punojmë fort. Të tre bashkitë janë përfaqësuese të PS, po bëhet një punë shumë e mirë,” u shpreh ajo për abcnews.
Po ashtu, Nikolla u shpreh se fakti që tre bashkitë janë të PS, është ndihmë për zgjedhjet pasi, puna e bërë deri më tani nga to, sipas saj, ka qenë e mirë dhe “brenda shinave” për trajtimin e të gjithëve me barazi.
“Ne po bëjmë një punë të strukturuar organizative në çdo qendër votimi. Për çdo qendër votimi po ndërtohet puna që ka të bëjnë me komunikimin. Puna e bashkive, investimet, rezultate në sektorë të caktuar. Me atë që është bërë me rindërtimin. Projektet investuese. Është një sfidë nuk është një fushë, ku e di që do ecim në këtë rrugë e do shkojmë në këtë rezultat,” u shpreh ajo në lidhje me punën përgatitore që po bëhet në Lezhë.
Sa i përket disa listave që po qarkullojnë në administratë, për “deklarimin e votës”, Nikolla u shpreh se kjo listë po qarkullon vetëm brenda strukturave të PS.
Në çdo rast të bërë jashtë, apo drejt punonjësve të administratës, thotë ajo duke përmendur edhe denoncimet e PD, duhet të drejtohen tek organet përkatëse.
