Ish-futbollisti gjerman, pjesë edhe e Real Madridit, Christoph Metzelder, është rrëfyer mbi çështjen e posedimit dhe shpërndarjes së pornografisë së fëmijëve, gjë për të cilën po hetohet, sipas informacionit nga revista “Der Spiegel”. Sipas këtij mediumi, i cili i referohet një rezolute të Gjykatës së Dyseldorfit, prokuroria e së cilës hapi hetimin përkatës, Metzelder i pranoi këto akuza gjatë një marrje në pyetje. Tabloidi “Bild”, në versionin dixhital thekson se ish-lojtarit iu gjetën në telefon 297 skedarë fotografikë me pornografi fëmijësh.
Ish-ndërkombëtari gjerman ua dërgoi disa prej atyre fotografive tri grave përmes aplikacionit WhatsApp. Prokuroria e Dyseldofit paraqiti akuzën e saj zyrtare më 4 shtator, megjithëse pa përmendur personin e përfshirë me emër. Në mediat gjermane, sidoqoftë, identiteti i tij ishte i njohur, pasi dyshimet për Metzelder dolën në dritën e publikut kohë më parë nga “Bild”. Nga konkluzionet e seancës gjyqësore kuptohet se i hetuari ka pranuar akuzat.
Shtatorin e kaluar nisën hetimet për Metzelder dhe policia i sekuestroi objekte të ndryshme, përfshirë të paktën një telefon celular dhe një kompjuter. Më pas dyshohej se Metzelder nuk ishte vetëm në posedim të imazheve të pornografisë së fëmijëve, por i kishte dërguar ato te tri gra. Metzelder luajti për Borussia Dortmund, Real Madrid dhe Schalke, ishte titullar i kombëtares gjermane që fitoi Kupën e Botës 2006./ Telesport
