Pse i shmanget Kryeministri Edi Rama një përballjeje me Lulzim Basha, ishte një nga pyetjet që Sokol Balla në emisionin Real Story, i drejtoi Kryetarit të Bashkisë së Tiranës, Erion Veliaj.
Ky i fundit tha se ne nuk mund të presim se çfarë do të bëjë Lulzim Basha, pasi ai mund të mos vijë fare të luajë.
“Ne në Jug jemi në mbrojtje pasi kemi një rezultat spektakolar në Fier dhe Vlorë. Në veri jemi në sulm, do të synojmë fitoren në Kukës dhe Dibër. Në Shqipërinë e mesme kemi një avantazh të lehtë.
LSI u rreshtua në kahun e humbësve, ndaj sot nuk mund të themi nëse mandatet në këtë kah do të mund ti materializojë.
Ndaj besoj se në Shqipërinë e mesme do të vazhdojmë të ruajmë avantazhin”, tha Veliaj.
Ai tha se tashmë janë ndarë edhe pozicionet në ekipin e PS, e cila ka në aleancë vetëm qytetarët.
“Basha vijon pushimet është në plazh, po i krijohen 3 parti të reja. Ne caktuam kush luan në mbrojtje, kush do të jetë në sulm dhe kush do të jetë në mesfushë”, tha Veliaj.
Sipas tij, kjo është hera e parë që PS nuk pësoi fraksione, që nuk doli një socialist dhe të krijojë një parti.
“E mbani mend Ben Blushin, i cili krijoi një parti dhe mori 10 mijë vota në Tiranë. Ishin vota të socialistëve. Sot nuk kemi një parti të tillë të krijuar”, tha Veliaj.
Ai tha se PS nuk ka nevojë për të pasur LSI në koalicion. “Ne sot po luajmë për mandatin e 74, nuk kemi nevojë për paterica apo këmbalec. Në Tiranë kemi ambicie 18 mandate”, tha Veliaj.
