Kryeministri Edi Rama ka reaguar sërisht lidhur me rastin e Manjola Cakonin, e cila humbi vajzën dhe bashkëshortin e saj në tërmetin tragjik të 26 nëntorit. Cakoni, në një video të publikuar nga PD, akuzoi Kryeministrin Edi Rama se e ka kërcënuar përmes telefonit duke i thënë “turp të kesh”, pasi kjo e fundit kishte denoncuar mungesën e ndihmave dhe mbështetjes nga Qeveria.
Duket se rasti në fjalë ka “prekur” Kryeministrin, i cili duke shfrytëzuar ERTV, ka bërë një sqarim të gjatë propogandistik.
Kryeministri thotë se zonja u përdor politikisht njësoj si tregu i gjësë së gjallë, ndërsa bën apel që të shihen faktet nëse qeveria e ka braktisur atë dhe familje të tjera të prekura nga tërmeti.
“Në rastin konkret, kam përjetuar me keqardhje abuzimin me të ëmën e Alesios, e cila është një grua e lënduar psikologjikisht, shpirtërisht, nga një tragjedi që nuk kalon pa i lënë gjurmë. Mendoj se e etika e medias dhe për më tepër e politikës, duhet ta ndalojë hedhjen e hapave të tillë për të konsumuar në publik njësoj si në një restorant, në një mjedis ku hahet mish, e njerëzve në nevojë, të traumatizuar dhe duhet t’i referohen fakteve.
Do të ishte e lavdërueshme nga pikëpamja etike që pa e abuzuar imazhin fizik në tregun e gjësë së gjallë t’i referoheshin fakteve dhe të shihni që unë dhe qeveria i kemi braktisur apo u kemi qëndruar pranë jo vetëm Manjolës dhe Alesios por të gjithë familjeve, qofshin ato që humbën njerëz qofshin familje që humbën shtëpitë e tyre.
Neveritem kur shoh se si hiena që e ka vendin në kategorinë më të ulët të kafshëve të pyllit, shfaqen në formën e personit publik, në formën e logos mediatike, në formën e përfaqësuesit politik, në formën e flamurit partiak dhe ha mish njeriu, duke i ftuar të gjithë në një orgji mishi dhe dehjeje me demek ndjenjën e solidaritetit dhe keqardhjes. Nuk është as solidaritet dhe as keqardhje. Ky është shpërdorim, abuzim, shpërdorim, dhunim i njerëzve”, shprehet Rama.
Më tej në videon e publikuar nga Rama, janë publikuar edhe fotot e kontratës së dhurimit të një apartamenti në Kamëz, ku ndër të intervistuarit është edhe kryebashkiaku i Kamzës, Rakip Suli.
Po ashtu në reportazh dalin edhe banorë të tjerë të prekur nga tërmeti, ku nuk i kursejnë lëvdatat për kreun e qeverisë në kamerën e ERTV-së, ku njëri prej tyre thotë se “Mua Edi Rama më ka puthur në ballë dhe me ka thënë do ta bëjë zoti më mirë”.
