Kryebashkiaku i Tiranës, Erion Veliaj, ishte sot i pranishëm në ceremoninë e inaugurimit të ambienteve të rikonstruktuara të shkollës “Jeronim De Rada”, e cila ka rreth 1100 nxënës. Ashtu sikundër është mësuar, Veliaj ka dhënë show-n e rradhës para të pranishmëve, edhe pse shkolla në fjalë është kthyer në një vatër infeksioni.
Të paktën 10 mësues nga 46 që ka shkolla gjithsej rezultojnë të infektuar me Covid-19, ndërsa nuk dihet se sa mund të jetë përhapur infeksioni pvrsa kohë mësuesit përgjatë ditëve të fundit kanë qenë në ambientet shkollore, kanë pasur kontakte me nxënës dhe prindër dhe kanë shpërndarë edhe libra.
Por e gjithë kjo situatë është kaluar nga Kryebashkiaku me 1 apo dy fjali, ku theksin e ka vënë në atë që brenda pak orësh u arrit të komandohej një drejtuese shkolle, pasi drejtoresha e saj, ishte e prekur nga Covid-19.
Me një fjalim sa politik aq edhe propogandistik, Veliaj tha se ata që sot kritikojnë, kur drejtonin Bashkinë e Tiranës, treguan se nuk ishin në gjendje të ndërtonin qoftë edhe një shkollë të vetme.
“Përdorimi i fëmijëve, i kopshtit, i çerdhes, si mjete për të bërë politikë, nga ata që tashmë janë diskredituar, flet shumë. Kështu thanë edhe për fushën në Laprakë, kështu thanë edhe për “7 xhuxhat”, që u bë kënd lodrash, kështu thanë edhe për lodrat te Liqeni, edhe për Parkun Rinia. Pyetja ime për ta është: A nuk u lodhët?! Ne do t’i zhgënjejmë me ndërtimin e një super kopshti nr. 42, me një super shkollë në Pezë dhe me një super shkollë në Kombinat”, deklaroi Veliaj.
Në fakt Kreu i Bashkisë së Tiranës mund të cilësohet si kampion në përdorimin që i bën fëmijëve jo vetëm në show-t që jep, por edhe gjatë fushatave. Dhe jo vetëm kaq, por ndërsa përmend rastet e objekteve të rikonstruktuara, Veliaj harron që një nga godinat e rikonstruktuara prej tij, shkolla Sami Frashëri, sot është kthyer në një shesh, pasi godinën ku u hodhën disa miliona lekë, 1 vit pas investimeve u detyrua ta shembë, pasi u dëmtua nga tërmeti.
“Për këdo që mundohet të përdorë merakun e prindërve, i them se do zhgënjehen shumë, jo vetëm më 25 prill, por do ta zhgënjejmë përditë, deri në 25 prill, kur do të vijë edhe zhgënjimi final i atyre që mundohen të përdorin meraqe prindërore për kauzat politike. Shkolla në Pezë Helmës do të hapet nesër në shkollën private “Vëllezërit Kajtazi”.
Ata nuk e përdorin më godinën sepse shkolla e tyre ka pësuar një transformim,kështu që atë ndërtesë do ta përdorim për nxënësit e Pezë Helmësit. Kur gjërat transformohen dhe produkti duket, kupton se politika e shëmtuar, me merakun e një prindi të sinqertë, me merakun e një fëmije, është një politikë që nuk ka të ardhme. Të ardhme ka politika e drejtë, pranimi i së vërtetës, pranimi i sfidave, ndarja e punës,pastaj çuarja e punës deri në fund, për të patur histori suksesi si sot me shkollën ‘Jeronim de Rada’”, tha ai.
