Nga Boldnews.al
Tre njerëz të rëndësishëm në parti propozoi Edi Rama si drejtues të fushatës elektorale në Tiranë; kryebashkiakun Erion Veliaj, ministren Elisa Spiropali dhe deputetin Ervin Bushati. Interesantë është përzgjedhja e Elisa Spiropalit për të bërë fushatë në zonat rurale të Tiranës, pra në fshat. Që tani mësohet se Elisa po bën prova, jo para pasqyrës, por në komunikim me miqtë e afërt për mënyrën sesi duhet të sillet.
Ka përzgjedhur garderobën më të mirë, por i kanë sugjeruar që kur të shkojë në fshatra të sillet më modeste, si në veshje, sjellje apo edhe me leksikun e saj, për të qenë më e kuptueshme, pasi shpesh kur flet, nuk ka gjuhëtar apo gjahtar fjalësh që ti japë kuptim thënieve të saj dhe lavdeve lapidar që thur, zakonisht dhe kryesisht për kryeministrin Rama, idhullin e saj të përjetshëm.
Zonja sqimatare do shkojë në fshatrat e Tiranës për të takuar një bujk që i shkon djersa curk me kazmën e belin në duar, me një lopë që e tërheq pas litarit. Elisa mund të vishet edhe thjesht sa për kamuflim, duke iu kthyer kohës kur militonte tek organizata “Mjaft” dhe dukej si “kooperativiste e thjesht”. Shumë ujëra kanë rrjedhur deri asokohe. Por edhe ai bujku i thjesht e di mjaft mirë cilën zonja ka përpara, e cila tenton ti mbushë mendjen se përse Edi Rama duhet të marrë një mandat të tretë, të katërt e me radhë sa të ketë frymën. Elisa fillimisht u bë Drejtoreshë e Përgjithshme e Doganave, sapo Rama mori mandatin e parë dhe më pas kur trau ulej e ngrihej në pikat e kalimit kufitar, mori me vete edhe akuzat për miliona euro dëm nga kontrabanda.
Rama nuk e lëshoi, përkundrazi, e bëri deputete, ministre dhe tashmë e ka ngritur sërish në detyrë, duke i ofruar në duart e saj të buta fushatën elektorale për zonat rurale në Tiranë. Elisa do bisedojë me fshatarë, ata që rropaten për mbijetuar për veten dhe familjen. Që janë nginjon me pretimet se në çdo parcelë do shkonte uji vaditës, por vit pas viti shohin sesi produktet bujqësore u thahen nga mungesa e ujit dhe mospastrimi i kanaleve.
Mund të dëgjojë edhe ankesa për mungesë investimesh, për asnjë pikë fondesh për subvencionimin e bujqësisë, që tokat i kanë ende pa dokumenta sepse ata drejtorët e Rilindjes të mbajnë një jetë zvarrë nëse nuk i dorovit me euro nëndorë, por Elisa është përgatitur për tia dalë edhe këtyre ankesave. Ashtu me “thjeshtësinë” dhe gjestikulacionet e saj mahnitëse që janë një imitim aq brilant si idhulli i tij Rama do tentojë të çorientojë mendjen e bujqve.
Ministrja Elisë do takohet edhe me zonjat e fshatit, ato gra që do meken nga parfumi i shtrenjtë i saj, i ardhur kushedi se ku nga dyqanet e luksit në Europë! Do i tregojë Hakiut, Xhemalit, Sadikut apo Hajdarit sesi qeveria Rama po bën investime madhore, sesi e ka shkulur nga rrënjët korrupsionin, apo që nuk ka më në parti asnjë person me të shkuar e të tashme kriminale.
Ndonjëherë mund ti shkajë goja para fshatarit tiranas duke ua kujtuar se Rama është Skënderbeu i saj, por edhe i yni. Barrë të rëndë ka marrë zonja që periferinë e njeh vetëm për kulinarinë që ofrojë lokalet, të cilët në të shumtën e rasteve janë ngritur nga bota e errët e krimit e lidhur me pushtetin. Realiteti në fshat nuk është haluçinacioni 3D në mendjen e ministres dhe militantëve me tru të larë dhe shpëlarë në lavatriçen e Rilindjes.
