Nga BoldNews.al
Anëtari i Asamblesë së Partisë Demokratike, Jolio Dine, ka publikuar një foto në rrjetin social “Facebook”, në të cilën, sipas tij, gjenden personat që kanë diskutuar një vit më parë në Korfuz për dhënien me koncension të Parkut të Butrintit.
“Butrinti i jepet privatit??”, ngre pikëpyetjen Dine, i cili shkruan se “në 12 Tetor të një viti më parë denoncova një takim të fshehtë, të zhvilluar në 25 Gusht 2019 në Korfuz, ku u diskutua dhënia e Butrintit tek një Fondacion i huaj”.
Ai shkruan më tej se “Sot po publikoj fotot ekskluzive të personave dhe automjetit që udhëtuan me traget nga Saranda për në Korfuz. A mund të jepet trashëgimia jonë tek të huajt”, mbyll postimin Dine?
Qeveria shqiptare po zhvillon idenë e menaxhimit të Parkut Arkeologjik të Butrintit për 10 vitet e ardhshme me një formë të re, të parealizuar më parë, nëpërmjet partneritetit me organizma të huaj.
Në ligjin e miratuar së fundmi, Agjencia menaxhuese quhet “Fondacioni”, por nuk ka shumë detaje, me përjashtim të faktit që është një partneritet ndërmjet Ministrisë së Kulturës dhe një partneri strategjik.
Ndryshimi në mënyrën e menaxhimit është një pjesë e “Planit të Menaxhimit të Integruar për Parkun Kombëtar të Butrintit”, miratuar nga qeveria shqiptare dhe hartuar nga kompania angleze “Prince and Pearce”, kontraktuar dhe mbështetur nga Fondacioni Shqiptaro Amerikan për Zhvillim (AADF).
Kjo ide shënon edhe herën e parë që në menaxhimin e Butrintit do të përfshihej edhe një subjekt jo-publik.
Sipas idesë se qeverisë, kjo mënyrë menaxhimi do të sigurojë menaxhim më të mirë të Parkut të Butrintit, si edhe të ardhura më të mëdha, që do të përdoren për përmirësimin e tij.
Por, ky propozim ka shkaktuar reagimin e ekspertëve të fushës së arkeologjisë. Studiuesi Agron Alibali, i cituar nga “Zëri i Amerikës” deklaron se “forma e re e menaxhimit të Butrintit shkel Konventën e Parisit, e cila përcakton rolin e padiskutueshëm parësor të shteteve anëtare, në administrimin e pasurive kulturore dhe natyrore në territoret e tyre”.
Specialisti Auron Tare, ish-drejtor i Parkut të Butrintit dhe një prej njerëzve të afërt të kryeministrit Edi Ramë, është gjithashtu kundër propozimit për menaxhimin e tij nga subjekte private.
“Butrinti ka nevojë për përmirësim, ka nevojë për administrim, për koncept. Por, në asnjë mënyrë nuk mund t’u jepet për menaxhim të huajve”, citohet Tare në media, i cili thekson se në këtë mënyrë cënohet identiteti kombëtar.
