Thomas Muller është përshkruar si “lojtari më i jashtëzakonshëm në historinë gjermane të futbollit” nga ish-trajneri tij te Bayern Munich, Jupp Heynckes.
Mesfushori me tipare sulmuese Muller, 30 vjeç, e ka kaluar gjithë karrierën e tij me bavarezët dhe ka fituar pothuajse çdo trofe të madh në dispozicion me gjigantët gjermanë, si dhe duke ndihmuar ekipin e tij kombëtar në fitimin e Kupës së Botës.
Gjithashtu, Muller, ishte golashënuesi më i mirë në Kupën e Botës 2010, ku një skuadër e re e Gjermanisë përfundoi e treta, përpara se të luante një rol kryesor teksa të besuarit e Joachim Loë fituan turneun e vitit 2014, duke shkatërruar Brazilin me rezultat 7-1 në gjysmëfinale përpara se të mposhtnin Argjentinën pas kohës shtesë në finale.
Duke folur për “DFL Magazine” Heynckes tha se Muller “prej kohësh ka treguar atë që e ka dalluar gjithmonë: të jetë i dobishëm për ekipin, punëtor dhe jashtëzakonisht i fortë”, dhe e përshkroi atë si “lojtari më i jashtëzakonshëm në historinë e futbollit gjerman”.
“Ai është mishërimi i një futbollisti profesionist i cili gjithashtu përputhet plotësisht me parimet e Bayern si klub. Ai jeton për futbollin, futbolli është hobi i tij, puna e tij. Në të njëjtën kohë, ai është zhvilluar si person.”
“Për mua, për atë që ai përfaqëson si futbollist dhe si karakter në përgjithësi ai është lojtari më i jashtëzakonshëm në historinë e futbollit gjerman së bashku me Gerd Müller-in e madh,” deklaroi Heynckes.
