Lëvizja Vetëvendosje shprehet kundër marrëveshjes së arritur në Uashington mes Kosovës e Serbisë.
Vetëvendosje shprehet se Avdullah Hoti, të cilin e cilëson kryeministër të paligjshëm e jolegjitim, tha se po shkonte në Uashington për njohje reciproke, por u kthye me shumë dëme për Republikën e pa njohjen e saj.
“Pra, shkuan për njohjen, ndërkaq u pajtuan që të mos angazhohen për e anëtarësim në organizata ndërkombëtare për një vit. Shkuan për njohje, ndërkaq u pajtuan për ndarjen e Liqenit të Ujmanit. Shkuan për njohje, ndërkaq u pajtuan për realizimin e idesë dhe qëllimeve të Serbisë për mini-schengen. Shkuan për njohje, ndërkaq u pajtuan t’i mundësojnë Serbisë qasje në detin Adriatik. Shkuan për njohje, ndërkaq me kërkesë të Serbisë e larguan emërtimin ‘Republikë’. Shkuan për njohje, ndërkaq sollën dëm, turp e rrezik”, shprehet Lëvizja Vetëvendosje në një postim në rrjetet sociale.
