Dalin detaje të reja lidhur me ngjarjen e tetë viteve më parë. Babë e bir, Faik dhe Shkëlzen Buçi, lindur në Dibër dhe banues në Babrru, janë të akuzuarit kryesorë nga policia, për vrasjen e 23-vjeçares Eglantina Buci.
Trupi i saj u gjet i gruposur në shtator 2012, në Malin me Gropa.
Pas hetimeve me bashkëpunimin edhe të mjekësisë ligjore të Kosovës u zbulua dhe eshtrat i përkisnin Eglantina Buçit, 23 vjeçe, mosha e saj në kohën kur u vra.
ADN-ja zbuloi tetë vite më vonë edhe identitetin e vajzës.
Pas të vëllait të saj, i dënuar me 13 vite burg për një krim tjetër dhe i akuzuar si vrasës me pagesë, i ati i vajzës, Faik Buci pas arrestimit ka dhënë dëshmi në polici mbi motivin e ngjarjes së rëndë.
“Ishte prostitutë në Turqi, e ka marrë një grup i rrezikshëm”, ka thënë i ati i vajzës, ndërkohë që ka mohuar akuzat se ai është pjesë e krimit. Ai tha se vajza i ishe zhdukur dhe nuk kishte më dijeni për të.
Një ditë më parë policia arriti të zbulojë se e reja ishte vrarë me armë zjarri nga babai i saj Faiku dhe vëllai Shkëlzeni pasi ishte larguar nga shtëpia për të bashkëjetuar me partnerin e saj pa dëshirën e tyre.
Babai 66-vjeçar i vajzës është arrestuar dje pasi gjykata vendosi “arrest me burg”. Vëllait të saj Shkëlzen Buçi i është komunikuar masa në burg ku vuan dënimin për një vrasje të mbetur në tentativë.
Autori është arrestuar më parë po nga Sektori Krimeve të Rënda Ndaj Jetës dhe Pronës në Drejtorinë Vendore të Policisë Tiranë, për një ngjarje tjetër, për “Vrasje me paramendim” të ngelur në tentativë, të ndodhur në Tiranë, në vitin 2017.
Ky shtetas aktualisht është duke vuajtur dënimin me 13 vite burgim pasi ka tentuar të vrasë aktorin Mishel Prela kundrejt pagesës.
Për këtë ngjarje, Drejtori i Policisë së Shtetit Ardi Veliu deklaronte më 22 korrik 2017 se vrasja e Mishel Prelës ishte porositur në këmbim të pagesës prej 80 mijë eurosh.
