Aktualisht, nuk ka asnjë provë që koronavirusi i ri që shkakton COVID-19 mund të transmetohet nga ushqimi, bën të ditur Autoriteti Kombëtar i Ushqimit (AKU), ndërsa citon informacionin nga Organizata Botërore e Ushqimit (FAO).
Në vijim të përditësimit mbi lidhjen e sigurisë ushqimore dhe pandemisë COVID-19, referuar FAO-s, AKU citon se, “virusi transmetohet kryesisht nga njerëzit që janë të infektuar përmes kollitjes dhe pikave të teshtimës të cilat më pas merren nga një person tjetër”.
AKU ka përgjigje edhe lidhur me pyetjen se a mundet që SAR-CoV-2, virusi që shkakton COVID-19, të rritet dhe të mbijetojë me ushqim.
Coronavirus nuk mund të rritet në ushqim. Ndërsa bakteret në kushtet e duhura mund të rriten në ushqim, një virus i tillë si ai që shkakton COVID-19, kërkon një mikpritës të gjallë në mënyrë që të shumohet. Megjithëse virusi mund të mbijetojë në objekte dhe sipërfaqe, nuk dihet për sa kohë mund të mbijetojë në ushqim dhe cila sasi e ndotjes do ta bënte të sëmurë një person.
Si mund të sigurohem që ushqimi im është i sigurt për t’u ngrënë?
Mënyra më e mirë për të shmangur COVID-19 është përmes praktikave të mira të higjienës. Gjithmonë lani duart me sapun dhe ujë për të paktën 20 sekonda dhe thajini mirë me një peshqir të pastër – pasi keni bërë pazar, para se të përdorni ushqimin dhe gjatë përgatitjes, para se të hani dhe pasi të përdorni tualetin. Të gjitha pajisjet dhe sipërfaqet e përdorura për përgatitjen e ushqimit duhet të lahen dhe pastrohen, citon AKU.
