Presidenti Ilir Meta ka zhvilluar sot takime të njëpasnjëshme me drejtues dhe përfaqësues të partive politike në kuadrin e konsultimeve për datën e mbajtjes së zgjedhjeve parlamentare.
Opozita e Bashkuar ka propozuar si datë 18 prillin, e cila nuk është kundërshtuar as nga socialistët e përfaqësuar nga Kryeministri Edi Rama.
Ky i fundit në takimin me Metën nuk ka propozuar ndonjë datë preferenciale, edhe pse më parë Taulant Balla ka kërkuar që zgjedhjet të mbahen më 9 maj.
Periudha zgjedhore, referuar Kodit të ri Zgjedhor, nis më 15 prill dhe mbyllet më 15 maj, çka do të thotë që në një nga të dielat e muajit, Presidentit do t´i duhet të caktojë edhe datën e mbajtjes së zgjedhjeve.
Burime nga Presidenca bëjnë me dije se data do të jetë 18 prilli, e propozuar nga opozita, ndërsa nuk ka pasur propozime konkrete nga PS për ndodnjë datë.
Në kushte të tilla duket se Kreut të Shtetit i mbetet të formalizojë 18 prillin si ditën kur do të mbahen zgjedhjet, që përkon edhe me të dielën e parë të periudhës zgjedhore.
E ndërsa socialistët kanë nisur fushatën duke caktuar drejtuesit politikë sipas qarqeve, PD është në fazën e përzgjedhjes së kandidatëve për deputet.
Në zgjedhjet e ardhshme do të aplikohen listat e hapura, si dhe teknologjia për identifikimin e zgjedhësve.
