Ministri i Brendshëm, Sandër Lleshaj, ishte një nga emrat që pritej të caktohej si drejtues politik për zgjedhjet e ardhshme parlamentare, ndërsa shanset më të mëdha i kishte që të caktohej në qarkun e Lezhës.
Por Kryeministri Edi Rama, njëherazi edhe kryetar i PS-së, zgjodhi që drejtues i qarkut të Lezhës të jetë Lindita Nikolla, ish-ministre e Arsimit dhe që në 2013 drejtoi fushatën e socialistëve në të njëjtin qark.
Në këtë vendimmarrje të Ramës duket se kanë ndikuar edhe pakënaqësitë e shprehura nga socialistët e Lezhës ndaj ministrit të Brendshëm. Mësohet se pak kohë më parë në drejtim të Ramës është dërguar edhe një peticion kundër Lleshajt, çka duket se ka dhënë rezultat në një moment të dytë, atë të caktimit të drejtuesve politikë sipas qarqeve.
Referuar të dhënave mësohet se Lleshaj nuk ka pranuar që degën e PS-së në Mirditë ta drejtojë Pjetër Pjetri, gjë që është shoqëruar me një protestë të fortë të strukturave socialiste lokale.
Burime nga PS shprehen se në mënjanin e Lleshajt ka ndikuar kryebashkiaku i PS-së, Pjerin Ndreu, i cili prej muajsh ndodhet në një përplasje me ministrin e Brendshëm.
Përplasjet kanë nisur që gjatë kohës së inspektimeve për dëmtimet nga tërmeti i 26 nëntorit, kanë vijuar me shembjen e ndërtimeve në bregdet, si dhe mbi masat administrative të aplikuara nga policia kundër administratorëve të lokaleve në kuadrin e masave të pandemisë.
Por duket se këto janë vetëm pjesa e dukshme e përplasjeve, pasi burime nga PS theksojnë se gjithçka ka të bëjë me influencat politike në këtë qark. Pasi ka marrë postin e ministrit të Brendshëm, Lleshaj duket se ka tentuar të vendosë influencën e tij politike në qarkun e Lezhës, veçanërisht në bashkinë kryesore.
Por, duket se të njëjtën gjë ka pasur pikësynim edhe Ndreu, ish-drejtues i lartë i Policisë së Shtetit në qeverisjen e socialistëve, i larguar nga funksionet, dhe i angazhuar në strukturat e PS, deri u bë deputet.
Në përplasjet mes dy zyrtarëve, njëri ministër dhe tjetri kryebashkiak, u duk se Kryeministri Rama do të mbante anën e Lleshajt, por balancat kanë ndryshuar dhe Ndreu, sipas burimeve nga PS, ka mundur të influencojë për mënjanimin e ministrit të Brendshëm, të paktën si drejtues politik në qark.
Këtu duket se është ndihmuar edhe nga strukturat lokale të PS, që prej të paktën dy muajsh protestojnë kundër Lleshajt.
