Nga BoldNews.al
Biznesmeni Florian Papadhima ishte një ndër dy këshilltarët e opozitës, të cilët në fund të vitit 2017 i shpëtuan mandatin Erion Veliaj, pasi votuan “in extremis” buxhetin e paraqitur nga kryebashkiaku i Tiranës.
Papadhima, i zgjedhur nga radhët e Partisë Republika, si edhe një këshilltar i Lëvizjes Socialiste për Integrim, votuan pro-Veliajt, duke mbajtur një qëndrim politik të kundërt me ato të grupimeve politike nga të cilat ishin zgjedhur.
Një dështim i mundshëm në miratimin e buxhetit, pritej të shoqërohej me largimin nga detyra të kryetarit të Bashkisë së Tiranës. Por, “manovrat politike” të minutës së fundit i siguruan, në atë kohë Veliajt vijimin e qetë të mandatit në drejtimin e kryeqytetit.
Pas kësaj loje politike jo-korrekte, Papadhima iu rikthye aktivitetit privat. Erion Veliaj duket se nuk ia ka harruar nderin që i bëri në vitin 2017.
Shoqëria “PAB Tirana”, ku Papadhima është një ndër aksionerët kryesorë, është shpallur së fundmi fituese e tenderit “Shporta e bebes” të zhvilluar nga Bashkia e Tiranës, me vlerë rreth 400 mijë euro (me TVSH).
“Shporta e bebes”
Në Shkurt 2020, kryetari i Bashkisë së Tiranës, Veliaj, deklaroi se kishte vendosur që të zëvendësonte bonusin prej 5 mijë lekësh për fëmijët e sapo-lindur, me projektin “Shporta e bebes”.
Sipas Veliajt, çeku financiar, i dhënë prej shumë vitesh për prindërit e rinj, do të zëvendësohej nga një paketë, e siguruar nga Bashkia e Tiranës nëpërmjet një tenderi, ku do të gjendeshin produkte për higjienën e neonatëve.
“Boldnews.al” raportoi më herët se projekti “Shporta e bebes” duket si një “manovër” e Veliajt për të ulur shpenzimet e Bashkisë së Tiranës
Nëpërmjet tenderit “Shporta e bebes”, i cili kishte një fond limit prej 37.6 milionë lekë të reja, Bashkia e Tiranës parashikonte blerjen e 9 mijë seteve higjienike.
Në bazë të llogarive të thjeshta, për çdo bebe, Bashkia e Tiranës llogariti të shpenzonte maksimumi 4100 lekë të reja, ose rreth 20 përqind më pak se sa vlera e “çekut të bebeve”.
Tenderi
Bashkia e Tiranës ka shpallur në fund të javës që sapo u mbyll rezultatet e tenderit ‘Shporta e bebes”.
Sipas të dhënave zyrtare, të konsultuara nga “Boldnews.al”, rezulton se në tender kanë marrë pjesë 3 kompani; “Spar Albania”, pjesë e grupit financiar të drejtuar nga biznesmeni Samir Mane; “Eurolab Internacional Grup”, e njohur me emrin tregtar “Mapo”, si edhe “P.A.B Tirana” shpk.
Kompania “SPAR Albania” e Manes nuk ka paraqitur asnjë ofertë zyrtare dhe është skualifikuar automatikisht.
Kompania “Eurolab..” (MAPO), e cila kishte dhënë ofertën më të ulët, është skualifikuar, pasi Bashkia e Tiranës ka konstatuar se ajo nuk plotësonte disa prej kritereve të përcaktuara paraprakisht për tenderin.
Në përfundim, fituese u shpall “PAB Tirana” shpk, e cila ka dhënë ofertën me vlerë 36.3 milionë lekë të reja pa TVSH (rreth 400 mijë euro me TVSH). Oferta fituese përkthehet në një çmim prej 4 mijë lekë \të reja për çdo “shportë bebeje”.
Në bazë të të dhënave të Qendrës Kombëtare të Biznesit (QKB), kompania ‘PAB” shpk është themeluar në qershor të vitit 2018 nga Skënder Bregasi.
Vetëm 3 muaj më pas, në Shtator 2018, Ferdinant Papadhima nënshkruan marrëveshje investimi me Bregasin.
Në bazë të kësaj marrëveshjeje, Papadhima ra dakord që do të investonte 175 mijë euro dhe, në këmbim mori 35% të aksioneve.
Deri një vit më parë, Papadhima zotëronte pjesën më të madhe të aksioneve të kompanisë, në shifrën 35%. Por, pas një marrëveshje biznesi të vitit 2019, ai shiti 15% të aksioneve, duke mbetur në shifrën 20%.
Aktualisht, kompania “PAB Tirana” ka 5 aksionerë, një prej të cilëve është edhe ish-këshilltari bashkiak, Ferdinant Papadhima.
