Presidenti Ilir Meta deklaroi këtë të Mërkurë se politika pastrohet nga elementët kriminalë apo të korruptuar vetëm me zgjedhje të lira.
Teksa ka marrë pjesë në Konferencën Shkencore me temë “100-vjetori i Luftës Kombëtare të Vlorës”, Meta u pyet nga gazetarët lidhur me datën e zgjedhjeve. “Do të dëgjoj përfaqësuesit e forcave politike dhe do flasim me siguri. Kam kërkuar takim me përfaqësuesit, përfshirë edhe kreun e Komisionit të Integrimit Europian”, tha Meta.
I pyetur për reagimin e ambasadores amerikane, e cila u kërkoi drejtuesve të partive në vend të mos fusnin në lista persona me rekorde kriminale, Meta deklaroi: “Mendoj që ka ardhur koha që përmes zgjedhjeve të lira e të ndershme të pastrohet gjithëçka në vendin tonë, që të kemi institucione të lira e legjitime. Vetëm zgjedhjet e lira e pastrojnë politikën nga elementët e korruptuar apo kriminalë që për interesa të caktuara, mbajnë peng institucionet dhe të ardhmen evropiane të Shqipërisë”.
Për çështjen e zgjerimit të Greqisë në detin Jon, Meta apeloi të bëhet kujdes me deklarata që mund të përdoren në dëm të Shqipërisë.
