Më 1 shtator skadon afati për plotësimin e formularëve nga kandidatët e përzgjedhur për deputet nga Komisioni i ngritur në PD.
Komisioni përzgjodhi 946 kandidatë nga 3648 emra të propozuar nga baza e PD, ndërsa ato do t´i nënshtrohen në mesin e muajit shtator votimit sipas parimit një anëtar një votë nga anëtarësia e demokratëve për të parë mbështetjen që kanë në bazë.
Formularët iu shpërndanë kandidatëve përmes postës elektronike më 28 gusht dhe bazuar në udhëzimin e kreut demokrat Lulzim Basha, ato kishin afat 5 ditë për plotësimin e tyre.
Formularët përmbajnë pyetje lidhur me shumë elementë, pvrfshi këtu edhe përdorimin e alkoolit, afeksionet ndaj të huajve, rretin shoqëror, madje edhe shoqërinë e Universitetit.
Burime nga PD theksojnë se mbi 90 % e formularëve janë plotësuar dhe janë depozituar në PD, ndërsa ka pasur edhe raste refuzimesh, sikundër ndodhi me ish-nënkryetaren e PD-së, Jozefina Topalli.
Tashmë emrat e kandidatëve kalojnë në atë që mund të quhet si faza finale, bazuar edhe në udhëzimin e kreut demokrat Lulzim Basha.
“Anëtarët e Partisë, sipas parimit “një anëtar, një votë”, bëjnë konfirmimin e kandidaturave të mundshme, sipas kësaj procedure: Listat e kandidatëve për konfirmim hartohen në nivel Dege, grup degësh apo Qarku, në varësi të numrit të kandidatëve apo numrit të anëtarëve në një Degë apo Qark. Në një ditë të shpallur paraprakisht për votim, çdo anëtar ka të drejtën që të shprehë kontestimin e tij (“votë kontestuese”) për një ose më shumë kandidatë nga lista. Numri i lejuar i kandidatëve që mund të kontestohen, përcaktohet në Fletën e Votimit dhe është jo më shumë se 20 % e numrit total të listës së kandidatëve, për secilën Degë apo Qark. Kandidati që ka më shumë se 20% “votë kontestuese”, në raport me numrin e përgjithshëm të anëtarëve të Partisë në atë Degë apo Qark, hiqet nga lista e kandidatëve të konfirmuar dhe përfshihet në listën e kandidatëve që u shtyhet aprovimi”, thuhet në udhëzim.
Kandidatët e listës së partisë përzgjidhen nga kandidaturat e konfirmuara nga anëtarësia në fazën e dytë, sipas këtij raporti: kandidaturat e konfirmuara nga anëtarësia do të përbëjnë jo më pak se 80 % të listës së kandidatëve të Partisë në zgjedhje, ndërkohë që jo më shumë se 20% e listës së kandidatëve do të përzgjidhen nga Kryesia e PDSH-së, si prurje të reja nga bota akademike apo shoqëria civile; përfaqësues të të përndjekurve politikë apo pronarëve; përfaqësues të diasporës; përfaqësues të sipërmarrjes; personalitete politike me kontribut të gjatë në parti; etj.
