Nga Boldnews.al
Arrestimi i drejtuesit të Tatimeve të Korçës, Thoma Tontozi dhe një vartësi të tij, është një ndër dhjetrat dosjet për “korrupsion të rëndomtë” që ka në dorë Prokuroria Speciale-SPAK, 7 muaj pas krijimit të saj.
Dy tatimorët u vunë në pranga, nën dyshimet se kanë toleruar kontrolle në biznese të ndryshme në qytetin jug-lindor, në vijim të një hetimi të nisur nga Prokuroria e Posaçme.
Natyrisht, raste të tilla, të mbështetura në prova dhe fakte, duhen të dalin para drejtësisë. Por, hetime të kësaj natyre ka pasur edhe më herët, para se të krijohej SPAK, dhe ato janë zhvilluar nga prokuroritë lokale.
Në bazë të hetimeve të prokurorive të shkallës së parë janë arrestuar në kohë të ndryshme drejtues të tatimeve, doganave, por edhe zyrtarë të niveleve drejtuese në institucione të tjera të administratës shtetërore.
Ndaj, rasti më i fundit në Korçë rikthen sërish dyshimet se “detaji” ligjor, për të përqëndruar çdo lloj rasti korrupsioni pranë prokurorisë SPAK, duket se është një mjet për të bllokuar këtë strukturë hetimore me një volum të madh pune, duke mos i lënë “frymëmarrje” për hetimet e nivelit të lartë.
“Asfiksimi” i SPAK
Në duart e një numri të kufizuar prokurorësh të seksionit kundër Korrupsionit gjenden aktualisht një numër i lartë rastesh, të referuara kryesisht nga Policia e Shtetit, për mitmarrje në radhët e zyrtarëve të ulët dhe të mesëm të administratës publike.
Të gjitha këto raste shoqërohen me qindra urdhëra delegimi veprimesh për Policinë Gjyqësore, akte për lejimin e përgjimit dhe vëzhgimit e të tjera shkresa.
Prokuroria Speciale u projektua për të hetuar, ekskluzivisht, korrupsionin në nivele të larta, një ndër pikat më të dobëta të shtetit ligjor në Shqipëri.
Por, një “modifikim” i minutës së fundit gjatë kohës që po amendohej Kodi i Procedurës Penale, në kuadër të Reformës në Drejtësi, vendosi që të gjithë rastet e korrupsionit të hetoheshin nga Prokuroria Speciale- SPAK.
Dhe, ndodh që, në të njëjtën ditë, SPAK-u njofton arrestimin e tatimorëve në Korçë, si edhe nisjen e hetimeve për kontratat koncensionare të inceneratorëve, bazuar në kallëzimin e dorëzuar nga organizatë e shoqërisë civile.
Prokurorët që po hetojnë inceneratorët, me shumë mundësi, do të ndërpriten herë pas here me korrupsionin e një polici, një mjeku, mësuesi, në administratën tatimore e doganore e të tjerë zyrtarë lokalë e të nivelit të ulët.
Në këtë mënyrë, hetimi i kontratave multi-milionë euroshe, tenderave “urgjentë”, dyshimet për korrupsion në procesin e rindërtimit dhe të tjera raste të ngjashme, të cilat janë domethënëse për shoqërinë shqiptare, do të vijojnë të hyjnë në kalendat greke.
