Shtëpia e vetme e Zaha Hadidit është ndërtuar në mes të një pylli rus

Biznesmeni Vladislav Doronin, pronar i shumë kompanive dhe zinxhirëve të hoteleve luksozë “Aman”, ka kërkuar nga arkitektja e famshme Zaha që të projektojë shtëpinë e tij të ëndrrave, në të cilën do të ndihet i lirë dhe do të zgjohet me shikim qetësues në qiell.

Koncepti, për këtë projekt të pazakonshëm është quajtur “Capital Hill Residence”, ka lindur gjatë takimit të Doroninit dhe Zahas në Londër, ndërkaq dizajni i parë i shtëpisë është vizatuar në një salvetë letre.

Duke pasur parasysh vednin malor, Zaha ka ideuar shtëpinë e pazakonshme të lartë në mënyrë që të ngrihet mbi pemët e pishave.

Apartamenti kryesor qëndron “pezull” në lartësi prej 22 metrash, duke i ofruar pronarit qetësi të plotë. Segmentin e poshtëm të shtëpisë e përbëjnë tri kate të ndërtuara pjesërisht në kodër, me fasada të pjerrëta xhami dhe kulme të gjera në formë të çrregullt.

Në katin përdhes janë të vendosura dhoma e ndejës dhe kuzhina, ndërsa dhomat e fëmijëve në katin e parë.

Shtëpia ka hapësira të shumta për argëtim, pishinën e mbyllur, qendrën e fitnesit, hapësirat për masazh, saunën dhe hamamin, bibliotekën, dhomat për mysafirë dhe klubin e natës.