Një ngjarje e rëndë ndodhi pasditen e sotme në Berat, ku një punonjës i drejtorisë Bujqësore në Bashkinë e Beratit humbi jetën, pasi ra nga lartësia, ndërsa ishte duke prerë një pemë.
46-vjeçari Shkëlqim Metkaj nga fshati Kamçisht, ishte duke punuar pranë ventit të quajtur ‘Ura e Goricës’ në qytetin e Beratit.
Punonjësit kanë qenë duke prerë një lis shumë-vjeçar që për shkak të erozionit të tokës dhe viteve, ishte anuar në rrugë dhe përbënte rrezik për jetën e qytetarëve e kalimtarëve që kalonin në të vetmen rrugë hyrëse dhe dalëse të qytetin muze.
Por fatkeqësisht puna e sotme ka rezultuar fatale për Metkajn, i cili ra nga vinçi dhe humbi jetën. Ndërkohë burimet bëjnë me dije se ai ka qenë duke punuar pa mjete mbrojtëse, e cila përbën një tjetër skandal për Bashkinë e Beratit dhe kryebashkiakun Ervin Demo.
