Kryetari i PD-së, Lulzim Basha u ka drejtuar një apel shqiptarëve në Malin e Zi: Votoni listat shqiptare.
“Ju bëj thirrje bashkëkombësve tanë në Mal të Zi që të dalin masivisht në zgjedhjet parlamentare të 30 gushtit dhe të votojnë listat shqiptare. Të dashur motra dhe vëllezër, nëpërmjet votës tuaj për partitë shqiptare, ju mund të siguroni mbrojtjen e të drejtave dhe interesave tuaja dhe të garantoni një të ardhme më të mirë për fëmijët tuaj”, shkruan Basha në një postim në FB.
“Ne krenohemi me faktin që shqiptarët në Mal të Zi kanë luajtur rol kyç në arritjen e pavarësisë së Malit të Zi dhe në përmbushjen e aspiratës së anëtarësimit në NATO. Jam i bindur që faktori politik shqiptar do të vazhdojë që në mënyrë konstruktive të japë kontribut të çmuar në përshpejtimin e integrimit europian të Malit të Zi. Forcimi i përfaqësimit të partive shqiptare në parlament, është një kontribut i shtuar për paqen dhe stabilitetin në vend, për garantimin e të drejtave të shqiptarëve në Mal të Zi dhe për integrimin europian të vendit dhe mbarë rajonit”, shton kryedemokrati.
Ndërkohë, kryeministri Edi Rama ka mbështetur Partinë Demokratike Socialiste të Milo Gjukanoviçit, drejtues i Malit të Zi prej vitit 199 dhe jo partitë shqiptare.
Kujtojmë se partitë shqiptare në Mal të Zi garojnë në zgjedhjet e 30 gushtit me një listë të përbashkët, me qëllim maksimizimin e votave.
Lexo edhe:
Rama kundër partive shqiptare në Mal të Zi, mbështet Gjukanoviçin
