Putin nuk pranon akuzat se ka miratuar helmimin e kritikut të tij, Aleksei Navalni. Zëdhënësi Dmitry Peskov tha se pretendimet janë të pavërteta dhe nuk mund të merren seriozisht.
Doktorët në Gjermani, ku 44-vjeçari po trajtohet, konfirmuan helmimin në një raport paraprak. Por, Peskov vendosi në dyshim deklaratën e qeverisë së Berlinit, duke e konsideruar të nxituar. Gjithashtu, refuzoi kërkesën e Bashkimit Europian për një hetim ndërkombëtar të rastit në fjalë.
“Nëse substanca identifikohet dhe përcaktohet se është helm, atëherë sigurisht që do të ketë arsye për të hetuar”, u shpreh Peskov.
Navalni u sëmur rëndë gjatë një fluturimi nga Tomsk për në Moskë të enjten e kaluar. Më pas, udhëtimi u devijua për në Omsk të Siberisë, ku doktorët e mjekuan për 3 ditë përpara se të lejonin transferimin për në një spital të Berlinit.
Mbështetësit e opozitarit janë të bindur se pas kësaj qëndron një tentativë helmimi. Ka dyshime të forta që substanca toksike të jetë hedhur në një filxhan çaji në aeroportin e Tomsk. Ndërkohë, doktorët gjermanë bëjnë me dije se gjendja e tij është serioze, por nuk është në rrezik për jetën.
