Një ditë më parë u regjistrua një përleshje me armë zjarri në Nekoc të Drenasit, ku një person mbeti i vrarë dhe tre të tjerë të lënduar.
Bëhet e ditur se autori i dyshuar i vrasjes, dyshohet të jetë djali i Shaban Sylës, i dënuar në rastin “Bllaca 2”.
Sipas burimeve, viktima së bashku me vëllain dhe babanë ishin duke lëvizur me kamion, ndërsa tre të dyshuarit (vëllezërit Syla) kanë qenë mbrapa tyre me një veturë.
Gjithashtu mësohet se personi që mbeti i vrarë nga kjo përleshje është Qamil Demiri, i cili ka qenë ish-ushtar i Ushtrisë Çlirimtare të Kosovës.
Burimet kanë treguar se ngjarja nisi me një fjalosje, ku gjatë kësaj kohe njëri nga të dyshuarit ka gjuajtur me kallashnikov në drejtim të viktimës, i cili pas plagëve të marra ka humbur jetën.
Po ashtu shtoi se babai i viktimës ka marrë plagë në këmbë, kurse vëllai është lënduar nga mjete të mprehta. Ndërkohë policia e Kosovës ka njoftuar se janë në kërkim të tre personave të dyshuar.
