Një 18-vjeçar është vënë në pranga nga policia e Elbasanit pasi akuzohet se ka përndjekur dhe ka ushtruar dhunë ndaj një vajze 14-vjeçe. Kjo e fundit ka treguar te prindërit për ç’ka i ka ndodhur, duke sjellë hakmarrjen e të atit të vajzës. Sipas policisë, ky i fundit është arrestuar po ashtu pasi në bashkëpunim me dy persona të tjerë, kanë ushtruar dhunë dhe kanë marrë peng për disa orë adoleshentin.
Denoncimi në polici ka sjellë dhe vënien në lëvizje të uniformave blu që përveç arrestimit të 18-vjeçarit me iniciale L.H. dhe babait të vajzës – A.K., 49 vjeç, ka shpallur në kërkim dhe bashkëpunëtorët e këtij të fundit: G.Sh., 46 vjeç dhe O. K., 20 vjeç.
“Arrestimi i shtetasit L.H., 18-vjeç, u bë pasi nga tërësia e veprimeve hetimore rezultoi se ky shtetas, ka përndjekur dhe ka ushtruar dhunë fizike e psikologjike ndaj një shtetaseje të mitur 14-vjeçare. Ndërsa arrestimi i shtetasit A.K., (i ati i vajzës) dhe shpallja në kërkim e dy të tjerëve, u bë pasi këta shtetas në bashkëpunim mes tyre, ditën e djeshme dyshohet se kanë ushtruar dhunë fizike ndaj 18-vjeçarit L.H., si edhe i kanë hequr lirinë këtij të fundit, duke e mbajtur në një automjet për disa orë”, njoftoi policia.
