Ora shënon 7:46. E ulur në sediljet e fundit të autobusit të linjës Kombinat – Kinostudio, një zonjë pyet faturinon: Pse lejohen persona pa maskë në autobusë?
“Është detyre e policisë bashkiake ti kontrollojë, jo imja”, i përgjigjet ai.
Ashtu si mëngjesin e kësaj të Hënë, të njëjtën pyetje si zonja, e bëjnë shumë udhëtarë që lëvizin me linjat e autobusëve urbanë në Tiranë, teksa vënë re se si injorohen rregullat anti-COVID dhe ndihen të rrezikuar.
Me hapjen e aktivitetit të autobusëve urbanë në Tiranë, autoritetet në vend vendosën që udhëtarët dhe stafi të jenë të pajisur me maskë. Masa u bë e detyrueshme.
Në ditët e para të rinisjes së udhëtimeve, u raportua se rregulli u zbatua. Erion Veliaj, kryebashkiaku i Tiranës, shfrytëzoi rastin, duke postuar fotografi nga “kontrollet” që kryenin në autobusë, efektivë të policisë bashkiake.
Të njëjtën gjë e bëri edhe disa ditë më parë, përmes një postimi në rrjetet sociale.
Megjithatë, në realitet, situata shfaqet shqetësuese në këtë aspekt. Efektivët e policisë bashkiake nuk duken asgjëkundi në autobusët ku shumë pasagjerë lëvizin pa maskë në këto mjete, të pashqetësuar as nga punonjësit e linjave.
E gjitha kjo në një kohë kur rastet e reja me COVID-19, prej kohësh tashmë, raportohen mbi 120 çdo ditë. Dhe po çdo ditë, përfaqësuesit e Ministrisë së Shëndetësisë informojnë për jetë të humbura në spitalet COVID.
