Ministri i Diasporës, Pandeli Majko është kritikuar për mos-reagim lidhur me situatën në Kakavi. Këtë të Hënë, teksa drama ka marrë zgjidhje për shumë emigrantë të cilët përjetuan momente torturuese duke pritur me ditë të tëra për të kaluar për në Greqi, ministri ka reaguar përmes një postimi në FB.
“Falenderim për të gjitha strukturat shtetërore të angazhuara për përmbylljen e emergjencës humanitare vecanërisht për trupën ushtarake dhe policore të angazhura në kufirin me Greqinë fqinje, nën drejtimin e kolegëve Olta Xhacka dhe Sandër Lleshi. Ndaj si më të vecantë, që pavarësisht moshës, angazhimin të cilin ja kërkova kryepeshkopit Anasatas Janullatos, në ndërmjetësimin që kriza të përmbyllej sa më shpejt. Të tjerat, janë fjalë për ‘lugën’ e atyre që dinë vec cfarë nuk duan”, shkruan Majko.
Në postimin e Majkos, shumë prej komentuesve shprehin pakënaqësi për pafuqinë e shtetit shqiptar për të zgjidhur problematikën e emigrantëve shqiptarë të bllokuar prej gati një jave në Kakavi.
Ndërsa të tjerë, vënë në dukje reagimin e vonuar të ministrit të Diasporës.
“U bërë i gjallë më në fund o mjeshtër, ndihen shumë krenarë emigrantët me ministrin e nderuar të diasporës”, i komenton një qytetar.
Në replikë, Majko shprehet: “Gjallë” nuk të bën facebook-u dhe reklama. Bëj detyrën time dhe asgjë më shumë!”.
Reklamat në rrjetet sociale, në përpjekje për të përcjellë mesazhin se autoritetet po ndihmojnë emigrantët, janë shpërndarë pa kursim gjatë ditëve kur udhëtarët torturoheshin teksa prisnin në temperaturat e larta, pa ujë e pa ushqim për të kaluar doganën. Autorët ishin ministrja e Mbrojtjes Olta Xhaçka si dhe kryeministri Edi Rama.
Ta ketë për ta vallë këtë mesazh ministri Majko?
