Gjykata e Pogradecit caktoi masën e sigurisë “arrest me burg” për Ilir Berberin, i njohur ndryshe si “Liri i Rrushkës”, lidhur me sulmin me armë mbi hotelin e shtetasit Jetmir Muçllari.
Gjykata vendosi ta lërë Berberin në “arrest me burg” pa afat, nën akuzën se organizoi sulmin e datës 8 gusht 2020.
Seanca për Ilir Berberin, zgjati dy orë, me dyer të mbyllura.
Operacioni policor “Driloni” hodhi dritë mbi përfshirjen e personave të tjerë në ngjarje.
Në një konferencë për shtyp të drejtorit të Policisë Korçë dhe prokurorit të çështjes u njoftua arrestimi i 3 personave në kryeqytet dhe kapja e një arsenali armësh.
Brian Syzo, një tjetër person me precedentë kriminalë dhe i njohur për Policinë, që dyshohet se ka lidhje me këtë ngjarje, vazhdon të jetë në kërkim nga Policia.
Kujtojmë që tri ditë më parë, Policia e Korçës në bashkëpunim me Policinë e Pogradecit arrestoi Ilir Berberin, i cili ishte fshehur në pyll.
Ai kishte ndërtuar aty një kasolle, ku fshihej pas krimit të rëndë që tronditi dhjetëra pushues e jo vetëm.
“Ky shtetas dyshohet të ketë rolin e organizatorit të ngjarjeve të ndodhura pranë hotelit, ku në bashkëpunim me tre personat e mësipërm dhe disa të tjerë kanë kanosur me armë zjarri shtetasin J. M. dhe kanë qëlluar me armë zjarri në drejtim të hotelit, duke i shkaktuar dëme materiale godinës dhe 7 mjeteve të parkuara”, tha zyrtarisht Policia.
