Një grua e ulur anë rrugës dhe një efektiv policie që i vjen në ndihmë. Këto janë pamjet dramatike të radhës që publikohen në media nga Kakavija.
Sipas raportimeve të gazetarëve nga terreni, qytetarë të shumtë kanë braktisur mjetet dhe në këmbë po përshkojnë kilometra të tëra për të arritur doganën. I tillë ishte dhe rasti i zonjës në fjalë, e cila ka humbur ndjenjat teksa ecte.
Qytetarë të pranishëm në ato momente në zonë dhe efektivë të policisë i kanë dhënë ndihmën e parë.
Disa dhjetra minuta kaluan dhe asnjë autoambulancë nuk u shfaq në zonë, pavarësisht njoftimit nga ana e policisë.
Situata në Kakavijë vijon të mbetet kaotike prej katër ditësh, me radhët e makinave që sa vijnë e shtohen, në pritje për të kaluar kufirin për në Greqi. Disa prej qytetarëve, janë shprehur se kanë tre ditë që presin në radhë dhe në temperatura të larta. Shumë prej tyre kanë shfaqur shqetësime shëndetësore dhe ka pasur nga ata që janë transportuar në spital.
Radhët janë shtuar për shkak të rregullave të palës greke, që e mbyll doganën gjatë natës dhe nuk lejon asnjë udhëtar të kalojë kufirin pa bërë më parë testin e COVID. Autoritetet shqiptare ndërkohë mbeten të pafuqishme për ti dhënë zgjidhje situatës. Përveç Kakavijës, edhe në pikën tjetër kufitare me Greqinë – Kapshticë – situata shfaqet problematike.
