Pas tre ditësh që qytetarët torturohen duke pritur në radhë, tanimë kilometrike, për të kaluar kufirin me Greqinë nga Kakavija, ministri i Brendshëm Sandër Lleshaj kujtohet të bëjë një reagim.
Drejtuesi i Ministrisë së Brendshme shprehet se radhët, sipas tij të pashmangshme, janë krijuar nga procedurat e reja të testimit për Covid-19 në kufirin shqiptaro-grek. Ai thotë se në bashkëpunim me Ministrinë për Europën dhe Punët e Jashtme po bëhen përpjekje për të kërkuar para autoriteteve greke gjetjen e mundësive për përshpejtimin e procedurave të testimit dhe reduktimin e kohës së pritjes në kufi.
Ndërkohë, që u bën thirrje qytetarëve “që të informohen për gjendjen në Pikat e Kalimit Kufitar me Greqinë përpara se të ndërmarrin udhëtim drejt tyre, me qëllim që të shmangen sa të jetë e mundur pritjet e gjata në kushtet e temperaturave të larta”.
Nga ana tjetër, Ministria e Jashtme e drejtuar nga Gent Cakaj nuk ka bërë asnjë reagim zyrtar deri më tani lidhur me situatën e rënduar.
Prej tre ditësh, radhë të gjata janë krijuar në pikën kufitare të Kakavijës, pasi autoritetet greke nuk punojnë gjatë orarit 22:00-06:00 dhe për çdo qytetar është e detyrueshme që më parë të konfirmohet se nuk është i prekur nga koronavirusi, në mënyrë që të kalojë kufirin.
Radhët e gjata dhe oraret e zgjatura të pritjes kanë shkaktuar probleme shëndetësore për disa udhëtarë. Më herët gjatë kësaj të Premteje, u raportua se dy të moshuar, të cilin kishin kaluar orë të tëra pritjeje në makinë, u transportuan në spital.
Ka pasur shpesh momente tensione, me qytetarë që janë përplasur verbalissht me efektivë të policisë. Në një pjesë të rrugës, u vunë gurë në shenjë revolte, në mënyrë që të pengohej kalimi i automjeteve që vinin në Shqipëri nga Greqia.
Reagim ka pasur dhe nga politika. Presidenti Ilir Meta i kërkoi Ministrisë së Jashtme të vendosë kontakte me palën greke për të zgjidhur problemin e radhëve kilometrike në Kakavijë sa më parë.
“Katastrofe humanitare”, e quajti gjendjen ish-Zv.Ministrja e Integrimit Erisa Xhixho.
Radhë kilometrike, ndërkohë, janë krijuar dhe në Kapshticë.
