Policia e Shtetit njoftoi sot arrestimin e 3 personave lidhur me grabitjen me armë që iu bë një çifti, të cilëve iu morr makina luksoze dhe 6 mijë franga zvicerane.
Mësohet se të arrestuarit janë Kastriot Ramazani, Hamid Skuqi dhe Gazmend Doçi. Ata dyshohet se kanë mundur të vjedhin makinën në momentin që drejtuesi i saj kishte ndaluar për të blerë në një market.
Referuar raportimeve, drejtuesi i mjetit kishte lënë bashkëshorten në makinë, shtetase e huaj, e cila ka përjetuar momentet e frikës kur dy prej të arrestuarve e kanë kërcënuar me armë.
Ata e kanë detyruar gruan t´i japë paratë, rreth 6 mijë franga, si dhe më pas e kanë zbritur nga automjeti. Mësohet se makina e grabitur, e cila është gjetur nga policia, ishte Audi Q5, e cila i përket një shtetasi shqiptar të Maqedonisë së Veriut, me banim në Zvicër.
“Këta shtetas në bashkëpunim me njëri-tjetrin i vodhën nën kërcënimin e armës, automjetin luksoz dhe 6000 franga një shtetasi me banim në Zvicër, i cili kishte ardhur për pushime në Durrës,” njoftoi policia.
Kjo është ngjarja e dytë e rëndë brenda pak ditësh, pas asaj në Pogradec, ku u sulmua me armë një hotel.
