Presidenti turk, Recep Tayyip Erdogan deklaroi sot se Ankaraja nuk po kërkon tension në rajon dhe se kërkon dialog për mosmarrëveshjet.
”Mënyra e zgjidhjes së situatës në Mesdheun Lindor është përmes dialogut dhe negociatave. Ne nuk po ndjekim ndonjë aventurë të panevojshme dhe nuk kërkojmë tension”, u tha Erdogan anëtarëve të partisë së tij në pushtet në Ankara.
Erdogan sërish akuzoi Greqinë si përgjegjëse për nxitjen e tensioneve në Mesdheun Lindor duke i bërë thirrje Athinës të respektojë të drejtat e Turqisë.
Aleatët e NATO-s, Turqia dhe Greqia janë në mosmarrëveshje në lidhje me eksplorimin e hidrokarbureve në zonë.
Greqia dhe BE pretendojnë se kërkimi i Turqisë në rajon është i paligjshëm.
Turqia kundërshton duke thënë se zona e kërkimeve është brenda zonës së saj ekskluzive ekonomike.
Ankaraja rifilloi kërkimet në Mesdheun Lindor të hënën, si kundërpërgjigje ndaj një marrëveshjeje midis Greqisë dhe Egjiptit që përcakton të drejtat për shpimin për naftë dhe gaz në zonë.
Në korrik, Ankaraja vendosi të ndalojë përkohësisht shpimin për të vazhduar dialogun me Athinën, pas një kërkese të kancelares gjermane, Angela Merkel.
Erdogan tha se anija turke e kërkimit të gazit ”Oruc Reis” do të vazhdojë operacionet e shpimit në jug të ishullit grek të Megistit, afër territorit turk, deri më 23 gusht.
Erdogan tha se ai do të diskutojë çështjen me Merkel dhe Presidentin e Këshillit të BE, Charles Michel.
Të mërkurën, presidenti francez, Emmanuel Macron tha se vendi i tij do të forcojë përkohësisht praninë e tij ushtarake në Mesdheun Lindor në përgjigje të mosmarrëveshjeve mes Turqisë dhe Greqisë.
