Mariglen Topuzi një prej të arrestuarve nga Policia për ngjarjen e ndodhur në hotel “Voloreka” në Tushemisht, ka mbërritur në Gjykatën e Pogradecit.
Topuzi është transportuar nën masa të rrepta sigurie, ndërsa mësohet se forca të shumta policie kanë “blinduar” Gjykatën e Pogradecit.
Gjatë natës, RENEA finalizoi operacionin e koduar “Driloni”, ku në pyllin e fshatit Vërdovë, Pogradec, në një çadër që kishte ngritur enkas për t’u strehuar, u arrestua Ilir Berberi, person me precedent të theksuar kriminal, i cili mbante dhe armë zjarri pistoletë me vete.
Gjithashtu u arrestuan edhe 3 bashkëpunëtorë të tjerë të implikuar.
Dy ditë më parë u vu në pranga edhe një bashkëpunëtor tjetër.
Gjatë aksionit iu sekuestrua një armë zjarri tip pistoletë, municion luftarak dhe rrobat e përdorura për të drejtuar motomjetin gjatë kryerjes së këtyre ngjarjeve.
Të arrestuarit janë: Ilir Berberi, 52 vjeç, banues në Pogradec (me precedent të mëparshëm penal në fushën e krimeve kundër personit, pronës dhe sigurisë publike).
I.M., 29 vjeç, A. Xh., 29 vjeç, banues në Zvezdë, Maliq dhe E. H., 32 vjeç, banues në Pojan, Maliq (i dënuar më parë për veprën penale “Vjedhja”).
Ndaj Ilir Berberit, Gjykata e Rrethit Gjyqësor Pogradec ka vendosur masën e sigurisë “Arrest në burg”, për veprat penale “Kanosja për të mos kallëzuar”, “Kundërshtimi i punonjësit të policisë së rendit publik”, “Kundërshtimi i punonjësit që kryen një detyrë shtetërore ose një shërbim publik”, “Prishja e qetësisë publike” kryer në bashkëpunim”, për ngjarjen e ndodhur më datë 10 Shkurt 2020, në lagjen nr. 3 përpara Gjykatës së Shkallës së Parë Pogradec, ku në bashkëpunim me shtetas të tjerë, 52-vjeçari ka kanosur pronarin e hotelit për të mos dëshmuar në një seancë gjyqësore, si edhe kanë kundërshtuar punonjësit e policisë dhe IEVP gjatë kryerjes së detyrës.
Gjithashtu ky shtetas dyshohet të ketë rolin e organizatorit të ngjarjeve të ndodhura pranë hotelit, ku në bashkëpunim me tre personat e mësipërm dhe disa të tjerë, kanë kanosur me armë zjarri shtetasin Jetmir Muçllari, si edhe kanë qëlluar me armë zjarri në drejtim të hotelit, duke i shkaktuar dëme materiale godinës dhe 7 mjeteve të parkuara.
