Kur ka mbetur vetëm një muaj nga nisja e vitit të ri shkollor, një rikthim i mundshëm i nxënësve sërish në banka është vënë sërish në pikëpyetje.
Shifrat në rritje të vazhdueshme dhe paralajmërimet për një valë të dytë në vjeshtë kanë bërë që edhe dikasteri që harton politikat mësimore të ngrejë supet.
Gjithsesi, në tryezën e diskutimit janë tri alternativa: mësimi online njësoj si në pjesën e dytë të vitit shkollor që kaloi, mësim i alternuar midis atij online dhe në banka si dhe rikthimi i plotë i nxënësve në shkollë.
Paralelisht, MAS ka përfunduar xhirimin e videove për të gjitha temat mësimore në çdo lëndë, çka lë të kuptojë se është gati të presë te nxënësit në formatin online. Vendimin final, në fakt, nuk pritet ta marrë Ministria e Arsimit, por ajo e Shëndetësisë.
Është komiteti i ekspertëve ai që do të bindë ministrinë të çelë ose jo dyert për nxënësit këtë vit mësimor. Një gjë është e sigurt. Ecuria e pandemisë, përveç vitit që shkoi, do të diktojë edhe këtë vit shkollor.
MINISTRJA
Mësimi i kombinuar, një praktikë që disa shtete e kanë përqafuar tashmë, është përmendur edhe nga ministrja jonë e Arsimit, Besa Shahini. I fundit prononcim për këtë çështje daton në 2 korrik, kur shifrat e pandemisë ishin më të qëndrueshme dhe paralajmërohej mësimi i kombinuar në dy variantet e mësimdhënies: online dhe në shkollë.
“Viti i ri shkollor fillon më 14 shtator, ashtu siç është planifikuar, por nuk do të jetë njësoj si përpara pandemisë. Ne po zhvillojmë dhe thellojmë politikat e asaj që quhet mësim i përzier, ku një pjesë e mësimit do të zhvillohet në shkollë dhe një pjesë do të vijojë të mbetet online dhe do të zhvillohet edhe në kanalin RTSH shkolla. Pra, do të bëhet një kombinim ku pjesët që duhet domosdoshmërisht të kryhen në shkollë do të bëhen në shkollë dhe pjesët e tjera do të alternohen”, sqaroi ministrja asokohe, duke mos dhënë asnjë detaj mbi modalitetet e mësimit të përzier. Por, që prej 2 korrikut, nuk ka asnjë informacion më shumë.
Ç’THONË EKSPERTËT
Strategjia që do të ndiqet për rihapjen e shkollave është kthyer në shqetësimin kryesor të javëve të fundit në vend, njëjtë si në gjithë botën. Ekspertët shqiptarë të arsimit dhe të shëndetësisë janë pro hapjes së shkollave, por me rregulla të reja.
“Sot, edhe ekonomistët, edhe sociologët, e rendisin shkollën para ekonomisë. Mësimi online është gati i pamundur për arsimin fillor. Është ndryshe në gjimnaz dhe në universitete. Rruga është hapja e shkollës dhe ndërmarrja e të gjitha masave: higjiena, distanca fizike dhe maska”, shprehet ish-ministri i Arsimit, Myqerem Tafaj. Në të njëjtën linjë mendimi është edhe epidemiologu Ilir Alimehmeti, i cili shkon diçka më tej duke kërkuar diferencim mes zonave dhe sipas grupmoshave.
“Duhet parë nga shkolla në shkollë se sa i kanë mundësitë për higjienë dhe distancim. Atje ku janë zona me situatë epidemiologjike më të qetë, kryesisht ato rurale, problematika shkollore është shumë e ulët, kurse problematika më e madhe është në qendrat më të banuara. Diferencim duhet bërë edhe në bazë të moshave. Jo të gjitha shkollat janë njësoj. Gjimnazi ka më tepër kontakte, organizojnë grumbullime, ndryshe nga fillorja. Mosha të ndryshme e përhapin sëmundjen në mënyra të ndryshme”.
Krahas këshillave të ekspertëve janë kapacitetet e shkollave tona për të siguruar kushtet e duhura, qoftë për higjienë apo distancim social. Kujtojmë që një pjesë e tyre janë dëmtuar nga tërmeti dhe nxënësit e tyre ishin strehuar përkohësisht në turn të dytë në shkollat pritëse (më të afërtat)./Panorama
