Akuzohen për vrasjen e taksistit, Gjykata vendos arrest me burg për 2 vëllezërit

Gjykata e Tiranës caktoi arrest në burg për dy vëllezërit Sajmir dhe Arsil Shera të dyshuar për vrasjen e 71 vjeçarit Abdulla Budlla në Fushë Prezë. Autorët e kanë pranuar krimin e kryer, duke thënë se e kishin vrarë taksistin për shkak se ai kishte një lidhje jashtëmartesore me nënën e tyre.

Saimir Shera është shprehur se mes Budllës dhe nënës së tij ka pasur një lidhje dhe prej fjalëve që qarkullonin në fshat ishte detyruar të largohej nga Shqipëria.

“Vrasjen e bëra unë. Vëllai më ndihmoi vetëm me transportin. Nuk mund të duroja më. Gjithë fshati e dinte për lidhjen e nënës sime me Abdullain. Prej vitesh fjalët qarkullonin në fshat. Kam ikur nga Shqipëria prej fjalëve”, ka dëshmuar ai.

Sipas dëshmisë, kryerja e vrasjes është bërë momenti kur ka mësuar se Budlla i ka ngacmuar edhe motrën.

Shera është shprehur se kallashnikovin që ka përdorur në krim e ka pasur të fshehur që prej vitit 1997. Pasi ka njoftuar të vëllain që ta merrte me makinë, ka shkuar tek vendqëndrimi i taksive tek Lapidari në Fushë-Prezë dhe e ka qëlluar 71-vjeçarin disa herë. Shera pretendon se më pas është larguar drejt Fushë-Krujës, ndërsa armën e ka hedhur në një kamion me skrap.

LEXO EDHE  Marrëveshja e 5 qershorit, Demalia: Rama do veprojë siç do vetë, ndërkombëtarët të konsumuar

“Pak ditë më parë mora vesh që Abdullai kishte ngacmuar dhe motrën dhe nuk durova më. Mora kallashnikovin që e kisha të fshehur që në 1997 njoftova vëllain të vinte me makinë dhe sapo e pashë Abdullain tek vendqëndrimi i taksive tek “Labidari” e qëllova. Pas krimit u largova në Fushë-Krujë. Rrugës pashë një kamion me skrap dhe e hodha armën aty”, ka thënë Saimir Shera.

Abdulla Budlla u vra në Fushë-Prezë më 3 Gusht. Për këtë ngjarje janë vënë në pranga vëllezërit Saimir dhe Arsil Shera. Viktima ishte baba i 4 fëmijëve, 3 djem dhe 1 vajzë.