Lëviyja për Universitetin e konsideroi si farsë procesin e sotëm për votimin e drejtuesve të Universiteteve shtetërore.
“Situata e vështirë nuk na ka ndaluar të kritikojmë talljen e vazhdueshme të qeverisë me studentët. Ortakëria midis qeverisë dhe burokracisë universitare nuk mungoi as kësaj radhe kur kërkohej me çdo kusht zhvillimi i zgjedhjeve. Zgjedhjet e sotme në universitet janë edhe më të turpshme dhe diskriminuese. Pesha e votës studentore mbetet 10%, ndërkohë që mungesa e studentëve në auditorë e bën praktikisht zero pjesëmarrjen e tyre”, thuhet në reagimin e Lëvizjes për Universitetin.
Duke shprehur kundërshti për zgjedhjet, Lëvizja Për Universitetin shprehet se i ka konsideruar ato prej vitit 2015 si jodemokratike, fyese për studentët dhe riprodhuese të klaneve partiako-klienteliste.
“Edhe më i shëmtuar është kandidimi i disa pseudostudentëve për postet studentore në senatet akademike. Ata, servilë partish, kurrë nuk do të mbrojnë të drejtat studentore.
A ka zgjidhur burokracia universitare qoftë edhe një problem tonin? JO!
A ka qenë burokracia universitare pjesë e pazareve partiake? PO!
Sa herë është përdorur Senati Akademik si trampolinë e karrieristëve partiakë? GJITHMONË.
Për të gjitha këto arsye ne do t’i bojkotojmë dhe hedhim poshtë me përbuzje këto zgjedhje farsë. Ato nuk garantojnë përfaqësim demokratik të studentëve dhe i shërbejnë riprodhimit të një sistemi arsimor tjetërsues.
Pa rrëzimin e ligjit të arsimit të lartë dhe rritjen në 50% të peshës së votës studentore në universitete nuk mund të ketë zgjedhje”, thuhet në deklaratë.
