Bill Gates kritikoi testimet masive për koronavirus që kryhen në Shtetet e Bashkuara të Amerikës, gjatë një interviste për televizionin CNBC, duke thënë se shumica e tyre janë “krejtësisht të padobishme” pasi rezultati vonon shumë për të dalë.
Gates, ish-CEO dhe themelues i Microsoft, beson se njerëzit duhet të marrin përgjigjen e testit më shpejt sesa e marrin momentalisht, në mënyrë që të jenë në gjendje të ndryshojnë sjelljen e tyre dhe të mos infektojnë të tjerët.
“Duhen më shumë se 48 orë për të marrë përgjigjen. Kjo është e padobishme”, tha ai. Sipas Gates, kjo ka ndikuar edhe në vështirësitë e vendit për të ngadalësuar përhapjen e koronavirusit.
Adm. Brett Giroir, ndihmëssekretari për shëndetësinë në Departamentin e Shëndetit, është dakord me këtë pretendim të Gates.
“E kam thënë gjithmonë që përgjigjet e testimeve duhet të dalin brenda 24 orëve, do të isha shumë i lumtur sikur të ngrinim pika testimi kudo, por nuk kemi arritur ende në këtë pikë”, tha ai për CNN.
Sipas Giroir, pjesa dërrmuese e testimeve kryhen në laboratorë të mëdhenj dhe mesatarisht duhen 4,27 ditë për të marrë përgjigjen. Sipas të dhënave zyrtare, në 28 korrik, në SHBA u kryen 733243 testime, thuajse 3-fishi i testimeve që kryheshin në një ditë në fund të prillit.
