Aventura e Arthur Melo te Barcelona ka përfunduar më shpejt nga sa ishte parashikuar dhe në mënyrën më të keqe të mundshme.
Mesfushori brazilian, i cili do të luajë për Juventusin sezonin e ardhshëm ka vendosur të mos grumbullohet me skuadrën katalunjase për ndeshjen e Champions League kundër Napolit.
Ai ka njoftuar klubin se do të qëndrojë në Brazil, përpara se të udhëtojë drejt Torinos, ku do të bashkohet menjëherë me skuadrën e tij të re. Ky vendim i Arthur ka irrituar drejtuesit e Barcelonës, që pritet të marrin masa. Mediat spanjolle e kanë cilësuar qëndrimin e futbollistit si një “rebelim”.
Sipas tyre, kjo është një hakmarrje personale e Arthur, pasi klubi “blaugrana” insistoi deri në detyrim, që ai të pranonte tranferimin te Juventus. Braziliani u përdor në tratativat e Barcelonës me klubin juventin për Miralem Pjanic, pavarësisht se dëshira e tij ishte të vazhdonte karrierën në La Liga.
