Kryeministri Edi Rama i bëri thirrje opozitës parlamentare për të votuar marrëveshjen e 5 qershorit arritur në Këshillin Politik, për ndryshimet në Kodin Zgjedhor.
“Jam me mendje që duhet ta votojnë dhe duhet ta votojnë të gjithë edhe Myslimi, jo se mua më pëlqen, përkundrazi unë kam problem të madh. PS nuk detyrohet nga askush tjetër përvec nga njerëzit që përfaqëson dhe kur është në qeveri ndaj detyrimeve që ka ndaj këtij vendi”, tha Rama nga foltorja e Kuvendit.
Kreu i qeverisë deklaroi se më 30 Korrik do të votohet dhe hapja e listave.
“Kur vjen puna për hapjen e listave këtë e vendosim ne. Ky Kuvend do hapë listat më 30 Korrik”, tha Rama.
Hapja e listave, sipas marrëveshjes së Ramës me një pjesë të opozitës parlamentare janë pjesë e paktës së ndryshimeve kushtetuese, që përfshijnë po ashtu ndalimin e koalicioneve parazgjedhore dhe ndryshimin e pragut elektoral.
Opozita jashtëparlamentare, ndërkohë, është shprehur kundër ndalimit të koalicioneve.
