Në Pallatin e Kongreseve ka zgjatur vetëm pak minuta mbledhja e Këshillit Politik për reformën zgjedhore, ndërsa përfaqësues të opozitës së bashkuar, ashtu sikundër kishin njoftuar nuk ishin të pranishëm.
Kryeministri Edi Rama dhe negociatori socialist, Damian Gjiknuri, si dhe deputetja Rudina Hajdari dhe deputeti Myslim Murrizi, kanë shkuar në ambientet e Pallatit të Kongreseve.
Madje në mbledhje ka shkuar edhe i dërguari i SHBA-së, Ian Crawford, shefi i sektorit politik dhe ekonomik në ambasadën amerikane, i cili luajti një rol negociatori në marrëveshjen e 5 qershorit.
Mbledhja e sotme vjen një ditë pas firmosjes së marrëveshjes mes PS-së dhe opozitës parlamentare ku u dakordësuan që të votojnë në seancën e 23 korrikut në Kuvend marrëveshjen e 5 qershorit dhe më 30 korrik ndryshimet kushtetuese.
Mbledhja ka zgjatur më pak se 1 orë, ndërsa opozita e bashkuar kishte njoftuar më herët se nuk do të ishte sot e pranishme, por kërkoi zhvillimin e mbledhjes të enjten në orën 17:00 ose të premten në orën 11:00.
Rudina Hajdari kërkoi hapjen e listave 100 %, duke shtuar se ndryshimet Kushtetuese duhet të pasohen nga ndryshimet në Kodin Zgjedhor.
“Të jetë opsioni i hapjes së listave 100 %, le ta kenë në dorë partitë, por jo të sanksionohet se listat do të jenë të mbyllura në 1/3 e tyre”, tha pas mbledhjes Hajdari.
