Lideri i BDI-së, Ali Ahmeti, është ftuar nga Gjykata Speciale me seli në Hagë. Kjo është pohuar nga vetë Ahmeti me anë të një postimi në rrjetet sociale. Sipas Ahmetit, ai është ftuar nga Specialja në rolin e dëshmitarit.
Gjykata Speciale intervistoi së fundmi, Presidentin e Kosovës, Hashim Thaçin. Nuk dihet nëse edhe ftesa e Ahmetit ka të bëj me intervistimin ose jo të Thaçit.
Intervistimi i Thaçit dhe ftesa e Ahmetit vijnë pasi Gjykata Speciale më 24 prill ka paraqitur një aktakuzë për krime lufte dhe krime kundër njerëzimit.
Me Thaçin, në aktakuzë është i përfshirë edhe Kadri Veseli kryetar i Partisë Demokratike të Kosovës dhe disa persona të tjerë emrat e të cilëve ende nuk janë bërë publik.
Postimi nga Ali Ahmeti
“Të nderuar qytetarë,
sundimi i ligjit dhe arritja e drejtësisë së mirëfilltë joselektive, vendore dhe ndërkombëtare, janë synim dhe detyrim i imi i përhershëm në të gjithë veprimtarinë time.
Andaj, ju njoftoj që Dhomat e specializuara të Republikës së Kosovës, gjegjësisht prokuroria speciale e Kosovës, si një nga themeluesit e UÇK dhe anëtar i shtabit të përgjithshëm, më ka ftuar në cilësinë e dëshmitarit dhe pa hamendje kam pranuar ftesën si dhe kam vendosur kontakt konstruktiv dhe bashkëpunues me zyrtarët në Hagë.
Gjithëmonë kam qenë ithtar i drejtësisë joselektive dhe jam në dispozicion të tërësishëm të organeve të drejtësisë për ta dëshmuar çiltërsinë e luftës çlirimtare të popullit shqiptar përballë gjenocidit të regjimit serb të Millosheviçit”, shkruan Ahmeti.
