Ministria e Shëndetësisë njoftoi sot për 119 raste të reja me Covid-19 në 24 orët e fundit, 7 prej të cilëve ishin në Tepelenë.
Nga raportimet mësohet se 7 personat e prekur i përkasin 2 familjeve, të cilët banojnë në fshatin Dukaj të Tepelenës.
Ata janë infektuar në një dasmë, e cila është zhvilluar në Tiranë.
Raportohet se personave të kontaktit u janë marrë tamponët, ndërsa hetimi epidemiologjik vijon.
Ministria e Shëndetësisë raportoi sot se nga 482 testime tek të dyshuarit për Covid-19 u konfirmuan pozitivë 119 raste, ndërkohë që 4 persona kanë humbur jetën duke e çuar numrin e viktimave në 117.
