Dymbëdhjetë persona janë proceduar penalisht nga policia lidhur me protestën e pasdites së djeshme para kryeministrisë. Protestuesit kundërshtuan vendimin e qeverisë për mos hapjen e lokaleve të natës, ndërkohë që mesditën e sotme është paralajmëruar një tjetër tubim.
Burime zyrtare nga policia e Tiranës thanë se 12 shtetas, persona të identifikuar si organizatorë, janë proceduar penalisht për veprat penale “Organizim dhe pjesëmarrje në tubime të paligjshme” dhe “Pengimi i qarkullimit të mjeteve të transportit”.
“Gjatë zhvillimit të tubimit, Policia para se të ndërhynte për të shpërndarë tubimin, u ka bërë thirrje protestuesve që të shpërndaheshin, pasi nuk kishin marrë leje për zhvillimin e tij. Më pas, Policia shpërndau protestuesit, duke bërë disa shoqërime dhe ka filluar procedimin penal për 12 persona, si organizatorë të tubimit tek bulevardi ‘Dëshmorët e Kombit’, pasi kanë organizuar dhe protestuar në mënyrë të paligjshme, pa lejen e organeve kompetente”, njoftoi policia.
Policia e Tiranës apelon qytetarët që të respektojnë distancimin social dhe të përdorin mjetet mbrojtëse në vendet publike, me qëllim parandalimin e përhapjes së COVID-19, ndërsa problematikën apo shqetësimin që kanë ta adresojnë pranë institucioneve dhe organeve kompetente.
