Plagosja me thikë, në pranga autori

Alionid Sali, është vënë në pranga si autor i dyshuar i plagosjes me thikë të 46-vjeçarit Përparim Seati në Fier, gjatë mesditës.

Rreth orës 12:20, në Spitalin Rajonal Fier ka shkuar i plagosur me thikë 46-vjeçari, banues në Kasnicë.

Pas marrjes së njoftimit, u ngrit grupi hetimor i cili zbardhi ngjarjen duke arrestuar në flagrancë autorin e dyshuar, shtetasin Alionid Sali, 31 vjeç, banues në Kasnicë, Patos, i cili për motive të dobëta, në fshatin Kasnicë, ka qëlluar me thikë Seatin.

LEXO EDHE  KLGJ pezullon procedimin disiplinor ndaj gjyqtarëve Petrit Aliaj dhe Nazmi Troka

Pas kryerjes së veprës penale, 31-vjeçari u largua nga vendngjarja me mjetin e tij tip “Benz”, por disa orë më pas, u bë e mundur kapja dhe arrestimi në flagrancë i autorit të dyshuar në fshatin Drizarë, Mallakastër.

U sekuestrua në cilësinë e provës materiale thika dhe automjeti me të cilin u largua autori, njoftoi policia.

46-vjeçari i dëmtuar ndodhet në Spitalin Rajonal Fier nën kujdesin e mjekëve.

Ndërkohë, ndaj Alionid Salit është ngritur akuza për veprën penale “Vrasje me dashje e mbetur në tentativë”.