Vdekja e 16-vjeçares shqiptare, Maria Hyseni, në Trikala të Greqisë, vijon të mbetet një mister. Pistat janë vetëvrasje apo vrasje, ndërsa mjekësia ligjore ka konstatuar goditje në kokë dhe gjoks, të cilat sipas mjekëve janë shkaktuar prej rënies nga lartësia.
Megjithatë, pikëpyetja e madhe është nëse 16 vjeçarja shqiptare u hodh vetë apo e hodhën nga lartësia.
Trupi i saj i pajetë u gjet në oborrin e një kishe në zonën ku ajo banonte me familjen e saj. Familjarët hedhin dyshime se 16-vjeçarja u vra dhe kërkojnë drejtësi. Policia në dyshimet e para ngriti pistën e vetëvrasjes, por tashmë po heton edhe në atë të vrasjes.
Kjo për faktin se 16-vjeçaren e kanë marrë në telefon dhe hetimet pritet të zbardhin se me kë ka folur ajo para se të ndodhte ngjarja e rëndë.
Protothema.gr shkruan se sipas informacioneve 16-vjeçarja ishte e dashuruar me oficerin e policisë, një 27-vjeçar, dhe ishte me të vërtetë ajo që e takoi pak para se të ndërronte jetë.
Vajza 16-vjeçare kishte një takim me oficerin e policisë dhe sipas dëshmitarëve, marrëdhënia mes tyre ishte shumë e qetë dhe ato dukeshin të lumtur. Në fakt, takimi i tyre zgjati disa minuta dhe Maria, e shoqëruar nga oficeri i policisë, u kthye në shtëpinë e saj. Ata u ndanë, pak para se ajo të mbërrinte në shtëpi, për të mos u vënë re nga lagja se e mitura ishte në një lidhje.
Sipas të dhënave nga hetimi, pak para ngjarjes oficeri e lë Marian në orën 3:15 të mëngjesit në shtëpinë e saj dhe largohet. Por kamerat kanë fiksuar momentin kur telefoni i Marias bie dhe ajo u përgjigj. Në vend që të hynte në shtëpinë e saj, ajo u kthye dhe u largua.
Kjo pritet të hetohet dhe nëse gjenden detaje të reja, ngjarja mund të zbardhet.
