West Ham ia doli të triumfojë me shifrat 3-1 në sfidën direkte për mbijetesën përballë Watfordit dhe të konfirmohet edhe për një tjetër sezon në Premier League.
Në sfidën e zhvilluar në “Olimpic Stadium” të Londrës, vendasit e nisën shumë vrullshëm dhe arritën të zhbllokojnë rezultatin që në minutën e 6’ me anë të sulmuesit Michail Antonio, i cili gjeti kështu golin e tetë sezonal.
Vetëm 4 minuta më vonë ishte mesfushori çek Soucek që shënoi golin e dytë për West Ham, para se talenti Declan Rice të shënonte një gol spektakolar, për të mbyllur pjesën e parë në avantazhin e trefishtë të vendasve.
Asgjë për të bërë për Watford, që provoi reagimin në fillim të pjesës së dytë dhe arriti të gjejë golin me anë sulmuesit Troy Deeney, por më pas e pati të vështirë të depërtojë në mbrojtjen e kujdesshme të vendasve.
Deri në fund rezultati mbeti i pandryshuar dhe me këtë fitore West Ham u largua me 6 pikë nga zona e ftohtë, duke siguruar mbijetesën.
