Bylisi e shihte Kupën e Shqipërisë si një objektiv real për të shpëtuar sezonin e klubit. Ballshiotët kryesonin ndaj Tiranës pas ndeshjes së parë me rezultatin 2-1 por në takimin e kthimit u mundën 2-0 nga bardheblutë duke u eliminuar në gjysmëfinale.
Por në këtë humbje, Bylisi, kishte pretendime dhe iu afrua golit dy herë sidomos me Sallakun dhe Ndrecën, ndërsa protestuan fuqishëm për penalltinë e padhënë në momentin kur Torasa i ndërhyn nga prapa Ndrecës.
Nga dje në Ballsh kanë nisur që të mendojnë për ndeshjen me Laçin ku synohen tri pikët për të mbyllur njëherë e mirë hesapet e mbijetesës. Ndërkaq, klubi i Bylisit ka kërkuar që arbitri Klajdi Kola të mos arbitrojë asnjë ndeshje të Bylisit në të ardhmen.
Drejtuesit kanë sqaruar edhe deklaratat pas ndeshjes për presion ndaj Tiranës, duke thënë se zëra tifozësh nga tribuna qendrore, nuk janë qëndrime zyrtare të klubit.
Deklarata e plotë:
“FK BYLIS pas ndeshjes gjysmëfinale të Kupës së Shqipërisë, të zhvilluar me Tiranën në kryeqytet dhe duke parë arbitrimin e gjyqtarit Klajdi Kola, i cili na ka mohuar një penallti në minutën e 10-të (e 31 sekonda), duke mos akorduar qëllimisht një faull në zonë, ku Torasa bën ndërhyrje në mënyrë të parregullt ndaj lojtarit tonë Ndreca, do të kërkojmë që ky gjyqtar të mos e gjykojë më në asnjë ndeshje skuadrën e Bylisit.
Ky gjyqtar, me vendimet gjatë ndeshjes me Tiranën, na ka mohuar kalimin në finale. Në lidhje me një shkrim të botuar në të përditshmen sportive “Panorama Sport”, ku aludohet sikur u kemi thënë drejtuesve të Tiranës: ‘Do ta shihni në ndeshjen e fundit’, sqarojmë se asnjë zyrtar nga presidenca dhe stafi nuk ka folur pas ndeshjes, përveç trajnerit që ka dalë në konferencën e zakonshme për shtyp. Bëjmë me dije se FK BYLIS do të jetë në heshtje për shtyp deri në ndeshjen e radhës në kampionat me Laçin…!”.
