U arratis nga burgu grek, por u kap me 5 kg heroinë. Bëhet fjalë për shtetasin Agim Margegaj, 43 vjeç.
Sipas mediave greke, Margegaj ishte i dënuar me burgim të përjetshëm në Greqi, për disa vepra penale, por edhe me 35 vite burg në Shqipëri.
Ai ishte larguar nga burgu grek me një leje, të cilën e ka thyer, duke mos u kthyer më në vendin e vuajtjes së dënimit. Margegaj u kap pas operacionit të policisë në Artemida, Athinë.
Policia i gjeti me vete 5 kg 50 gram heroinë, 1 peshore elektronike, 1050 euro, kartë identiteti dhe pasaportë të falsifikuar, 2 celularë, 1 krehër arme, pajisje plastike presimi.
Droga kishte ardhur nga Shqipëria dhe policia greke po kërkon një mjet furgon tip Mercedez, i cili dyshohet se ka hyrë në territorin grek nga Kakavija.
Ai ishte dënuar për vrasje me dashje, tentativë vrasje më shumë se njëherë, grabitje në bashkepunim më shumë se njëhere, armëmbajtje pa leje, përdorim arme.
Gjithashtu ai rezulton i kërkuar në Shqipëri, pasi është dënuar me 35 vite burg për vrasje.
